Ковачевски и Петков соопштија дека Бугарија го прифаќа краткото име Северна Македонија, откако земјава, практично, направи отстапка, испраќајќи дипломатска нота до светската организација
Сакам да им се заблагодарам на колегите, бидејќи тоа беше подавање рака, оценил бугарскиот премиер во врска со нотата што С Македонија ја испратила до Обединетите нации, потврдувајќи дека двете имиња на државата (краткото и долгото) се подеднакво валидни и оти со употребата на краткото име немаме никакви територијалните претензии.
„Нотата не треба да се потценува, бидејќи тоа е гест кој покажува дека сакаме да одиме напред. Освен тоа, тие првпат не го направија целиот пакет, туку дадоа еден прв позитивен чекор, што не се случило две години“,
рекол Петков на брифинг со бугарските новинари кои ја следеа неговата денешна посета на Скопје, прва по стапувањето на функцијата.
На заедничката прес-конференција, Петков и новиот македонски премиер Димитар Ковачевски соопштија дека Бугарија го прифаќа краткото име Северна Македонија, односно дека ќе го користи и без „Република“, откако земјава, практично, направи отстапка, испраќајќи дипломатска нота до светската организација.
Прашањето за употребата на краткото име на земјава, всушност, е една од 5+1 точките за кои Скопје и Софија се усогласуваат подолг период. Односно, една од точките од „агендата“ што бугарскиот претседател Румен Радев ја наметна на самитот за Западен Балкан во Брдо кај Крањ, предвидуваше С Македонија да докаже дека нема територијални претензии кон Бугарија со користењето на краткото име на земјата.
Другите четири точики предвидуваат немешањето во внатрешните работи на Бугарија, историската комисија да се состанува барем пет пативо годината, да се осудат актите на комунизмот и да се реагира кон говорот на омраза. Дополнителната точка, пак, се однесува на можноста за внесување на бугарската етничка заедница во македонскиот Устав пред земјата да стане членка на ЕУ.