И министерот Бујар Османи денеска ќе престојува во Анталија, каде што ќе има средба со бугарскиот колега Светлан Стоев
Претседателот Стево Пендаровски од денеска ќе престојува во работна посета на Турција, каде што ќе учествува на самитот на претседатели на држави и влади на членките на Процесот за соработка на земјите од Југоисточна Европа, кој ќе се одржи во Анталија.
„Предвидено е претседателот Пендаровски да има свое обраќање на самитот, а ќе има билатерална средба со претседателот на Турција, Реџеп Таип Ердоган. Пендаровски ќе оствари средба и со потпретседателот на Европската комисија и висок претставник за надворешна и безбедносна политика на Европската Унија, Жозеп Борел“,
соопшти кабинетот на Пендаровски.
Шефот на државата утре, 18 јуни, ќе учествува на Анталија дипломатскиот форум, кој се одржува првпат под мотото „Иновативна дипломатија: нова ера, нови пристапи“, каде што ќе говори на претседателската панел-дискусија на тема „Како да ја зајакнеме регионалната солидарност во светло на научените лекции“.
Пендаровски во сабота, 19 јуни, во Истанбул ќе оствари средба со архиепископот цариградски, вселенскиот патријарх Вартоломеј.
Министерот за надворешни работи Бујар Османи денеска, исто така, ќе престојува во Анталија, каде ќе учествува на состанокот на министрите за надворешни работи на земјите членки Процесот за соработка на Југоисточна Европа (ПСЈИЕ).
Османи, како што информираат од МНР, во рамки на министерскиот состанок ќе има одвоена билатерална средба со домаќинот, министерот на Турција, Мевљут Чавушоглу, како и со министерот за надворешни работи во техничката Влада на Бугарија, Светлан Стоев.
Министрите, во рамки на овој регионален формат ќе дискутираат на тема: „Соседите од Југоисточна Европа заедно: Иднината на Европа”. Дел од агендата е изнаоѓањето нови начини за зацврстување на соработката меѓу земјите на ПСЈИЕ и регионот, справување со последиците од пандемијата предизвикана од ковид-19, унапредување на регионалната кохезија преку јакнење на политичката и економската соработка, како и кон демократијата, владеењето на правото, слободната пазарна економија и почитувањето на фундаменталните човекови права како основни европски вредности.