Не се исполнети условите за меѓувладина конференција со Скопје, се наведува во денешното соопштение, во кое се пласираат позициите на Софија за претстојниот самит на ЕУ
Условите за одржување меѓувладина конференција со Северна Македонија не се исполнети, соопшти денеска бугарското Министерство за надворешни работи – ден пред посетата на македонскиот премиер Зоран Заев на Софија.
Во соопштението се наведува дека позицијата на Бугарија во однос на евроинтеграцијата на РС Македонија останува непроменета, но дека соседната држава останува отворена за дијалог.
Како што се посочува, Советот на министри ја одобри позицијата на Бугарија да учествува на состанокот на Советот за општи работи на ЕУ, што ќе се одржи на 22 јуни во Луксембург.
Министерството за надворешни работи на Бугарија нагласува дека позицијата во однос на рамката за преговори за пристапување на Северна Македонија во Европската Унија останува непроменета. Рамката за преговори, како што се наведува, треба да ги содржи потребните гаранции во врска со спроведувањето на Договорот за пријателство и добрососедство од 2017 година, кои во моментов не се исполнети. Затоа, се нагласува, не се исполнети и условите за одржување меѓувладина конференција.
„Бугарија останува отворена за дијалог и презема чекори за градење доверба и враќање на прагматичен и конструктивен дијалог“,
соопшти МНР на Бугарија.
„Советот ќе размени мислења за политиката на проширување на ЕУ и Процесот за стабилизација и асоцијација и ќе се подготви за вонредниот состанок на Европскиот совет на 24-25 јуни 2021 година, вклучувајќи го ковид-19, економското закрепнување, надворешните аспекти на миграцијата, односите ЕК – Русија, односите меѓу ЕУ и Турција… Во делот за политиката на проширување на ЕУ и европската перспектива на Република Северна Македонија, во позицијата усвоена од Владата се наведува дека Бугарија се придржува до Декларацијата на Националното собрание, од 10 октомври 2019 година, и Рамковната позиција за европската перспектива на Република Северна Македонија усвоена од Советот на министри на 9 октомври 2019 година“,
објаснува бугарското МНР, во соопштението посветено на С Македонија.