Со измените во Кривичниот законик усвоени во Собранието, не е предвидена амнестија за кривичните дела сторени во вршење на службата, туку напротив, како што се наведува во соопштението од кај Пендаровски, казни и понатаму се предвидени за сторителите на тие дела, со „тоа што со овие измени акцентот е ставен и на т.н. проширена конфискација на имот
Одлуката да го потпише указот за прогласување на измените на Кривичниот законик, од кабинетот на Пендаровски ја соопштија откако денеска повеќе невладини организации упатија повици и официјални барања до неговиот кабинет да го стори спротивното и да го искористи своето право на вето
Шефот на државата Стево Пендаровски денеска одлучи да го потпише указот на за прогласување на Законот за изменување и дополнување на Кривичниот законик, соопштија од неговиот кабинет и покрај барањата на граѓанскиот сектор и дел од партиите од опозицискиот блок да го искористи уставното право на вето.
Со измените во Кривичниот законик усвоени во Собранието, не е предвидена амнестија за кривичните дела сторени во вршење на службата, туку напротив, како што се наведува во соопштението од кај Пендаровски, казни и понатаму се предвидени за сторителите на тие дела, со „тоа што со овие измени акцентот е ставен и на т.н. проширена конфискација на имот.
„Во тој дел, измените на Законикот се усогласени со eвропската Директива за замрзнување и конфискација на предмети и имотна корист, која освен казната затвор, фокусот го става на одземањето на имотната корист од сторителите на овие кривични дела“,
вели шефот на државата.
Претседателот Пендаровски очекува мерката проширена конфискација на имот да не остане само на хартија како што е досега, туку многу почесто да биде применувана во пракса и во сите случаи на констатирани злоупотреби во вршењето на службата, незаконски стекнатата имотна корист и злоупотребените средства да бидат вратени во буџетот.
Одлуката да го потпише указот за прогласување на измените на Кривичниот законик, од кабинетот на Пендаровски ја соопштија откако денеска повеќе невладини организации упатија повици и официјални барања до неговиот кабинет да го стори спротивното и да го искористи своето право на вето.
Од Платформата на граѓански организации за борба против корупцијата од каде и официјално се обратија до кабинетот на шефот на државата да не го потпише указот, како причина го посочија тоа што со измените на членовите 353 и 353-в, предложеното намалување на казните ќе резултира: со застарување на многу случаи од висок профил како „Титаник“, „Таргет/Тврдина“, ТНТ, „Титаник 2“, „Трезор“, „Талир“, „Шпански скали“ и „Траекторија“, како и други случаи од понизок профил; ќе се урниса довербата дека борбата против корупцијата е можна, и ќе ги демотивира граѓаните да пријавуваат корупција и ќе ја намали превентивната функција на системот на кривична правда.
Втората причина, како што посочија од невладината, е поврзана со процедуралните недоследности, во кои измените на овие два члена се разгледувани со специјална и кратка процедура под капата на европско знаменце, иако според постоечките кореспондентни табели не се усогласуваат со европското право.
Покрај Платформата на граѓански организации за борба против корупцијата, денеска и Блупринт-групата за реформи во правосудството соопшти дека од претседателот Стево Пендаровски побарала да не става потпис на указот со кој официјално во сила ќе стапат измените од Кривичниот законик, кои вчера ги усвои Собранието.
„Полагаме надеж дека ќе ги ефектуирате Вашите изјави и залагања за неопходноста на искоренување и прекинување на културата на неказнивост на високи функционери, како и практично оспособување за справување со тешки облици на организиран криминал и корупција“,
се наведува, меѓу другото, во барањето кое Блупринт-групата го испратила до претседателот Пендаровски.
Од Блупринт-групата предупредуваат дека доколку стапат во сила, измените во Кривичниот законик ќе предизвикаат непоправливи последици во борбата против организираниот криминал и корупција и ќе го декриминализираат високиот криминал кој во последниве две децении го сториле високи функционери.
Собранието вчера во рамките на 125. Пленарна седница експресно со 48 гласа „за“ ги усвои измените на Кривичниот законик, со кои, меѓу другото, се предвидува намалување на казните во членот 353 кој се однесува на злоупотреба на службената положба и овластување, кој најчесто се користеше за гонење службени лица и функционери, како и намалување на казните за делото злосторничко здружување од членот 394, односно наместо сегашните кои предвидуваат од една до десет години затвор, на една до три години затвор. Намалувањето на казните повлекува и порано застарување на кривичните дела.
Конкретно, за членот 353 од Кривичниот законик се предлага намалување на казните во неколку става.
Така актуелниот став 3 од членот 353 кој сега гласи: „Ако сторителот на делото од став 1 прибави значителна имотна корист или нанесе значителна штета, сторителот ќе се казни со затвор најмалку три години“, со усвоените измени гласи:
„Ако сторителот од делото од став (1) на овој член, со намера прибави за себе или за друг поголема имотна корист или нанесе поголема имотна штета, ќе се казни со затвор од една до четири години“.
Ова значи дека со предложените измени на членот 353, став 3, се намалува долната, а се воведува и горна граница на казна затвор за ова кривично дело. Односно, актуелното решение пропишува казна затвор од најмалку три години, а сега таа се ограничува меѓу најмалку една и најмногу четири години.
Со измените од членот 353 се брише ставот 5, што значи дека нема да има дополнителна затворска казна (до пет години) за лицата кои ќе бидат осудени за злоупотреба на службената положба затоа што го сториле делото при вршење на јавни набавки или на штета на Буџетот. Поточно, за ваквите кривични дела ќе си важат останатите ставови од членот 353 од Кривичниот законик.
Со измените на Кривичниот законик кои вчера ги усвои Собранието се брише и ставот 2 од членот 353-в и се менува ставот 3. Така, наместо казна затвор од најмалку три години за службено или одговорно лице во јавно претпријатие или установа кое ќе прибави значителна имотна корист или нанесе значителна штета, сега се поставува граница – од шест месеци до пет години.