„Очекувам дека во првиот круг, бидејќи има многу кандидати како никогаш досега во македонската историја, гласовите да се поделат на неколку страни и не очекувам дека има некој било каква шанса да добие во првиот круг, меѓутоа во вториот круг очекувам да влезам и да ги добијам изборите“, вели Пендаровски
Актуелниот шеф на државата и претседателски кандидат за изборите Стево Пендаровски очекува победа во вториот круг од претседателските избори. Според Пендаровски, гласовите во првиот круг, кој ќе биде на 24 април, ќе бидат поделени со оглед на големиот број кандидати кои ќе „трчаат“ за претседателското место.
„Очекувам дека во првиот круг, бидејќи има многу кандидати како никогаш досега во македонската историја, гласовите да се поделат на неколку страни и не очекувам дека има некој било каква шанса да добие во првиот круг, меѓутоа во вториот круг очекувам да влезам и да ги добијам изборите“,
рече Пендаровски на денешното отворање на неговиот изборен штаб во центарот на Скопје.
Пендаровски, на првиот ден од кампањата за избор на претседател, најави дека до крајот на првиот круг, планирано е да посети 65 населени места во сите изборни единици и во сите општини во Македонија.
„Очекувам да имам средби со илјадници граѓани и да им претставам што е мојата понуда за следните пет години. Некој ќе рече дека можеби преголемо претставување од моја страна не е потребно бидејќи зад себе имам петгодишен мандат и македонските граѓани многу добро знаат за што сум се залагал, за што сум бил против, што сум поддржувал и отприлика знаат кој политички профил може да го очекуваат и во наредните пет години, ако ми ја дадат довербата“,
додаде Пендаровски.
Меѓутоа, рече тој, мислам дека, контекстот изминатите пет години се има малку променето и регионалниот и внатрешниот, а, се разбира, и меѓународниот со војната во Украина и би требало да ги кажам новелирано моите ставови по некои прашања кои имаат посебна специфична политичка динамика.
По промовирањето на изборниот штаб, Пендаровски, кој е поддржан од СДСМ и коалицијата, според најавите, попладне во 17:30 часот го започнува својот изборен караван со почетна точка на движење од Кривогаштани, потоа ќе замине за Крушево, а во 20:30 часот ќе биде во Прилеп.
Пендаровски, пред два дена, на изборната конвенција во Скопје, најави дека ако ја добие довербата и во следните години, ќе продолжи да работи за плата, а не за проценти, ќе ги третира сите граѓани на еднаков начин, независно на кој народ му припаѓаат или за која партија гласаат, ќе соработува со младите и ќе продолжи да го критикува криминалот и високата корупција на кој било во државата, вклучувајќи ги и оние што го поддржале и гласале за него.