Повикувајќи се на член 23 од Законот за склучување, ратификација и извршување на меѓународни договори, претседателот Пендаровски може итно да реагира со низа наложувања до надлежните за спас на Охридскиот Регион, велат од невладината организација
Сакаме да веруваме дека сè уште постојат политички и институционални авторитети што се грижат за нашите природни и културни богатства, а со тоа и за интересите на граѓаните и јавноста, велат од невладината организација „Фронт 21/42“ и бараат претседателот на државата, Стево Пендаровски, да се погрижи за спроведувањето на препораките, односно спроведување на меѓународната конвенција, која е ратификувана уште во 1979 година.
Нивната реакција доаѓа по нацрт-извештајот на УНЕСКО во кој се констатира дека надлежните институции не ги спровеле препораките за зачувување и заштита на единствениот регион под заштита на УНЕСКО во земјава.
Повикувајќи се на член 23 од Законот за склучување, ратификација и извршување на меѓународни договори, кој предвидува дека за нивно извршување се грижат Владата на Република Македонија и претседателот на Републиката, од „Фронт 21/42“ бараат Пендаровски итно да му наложи на Министерот за животна средина и просторно планирање да донесе наредба за забрана на каква било урбана и крајбрежна трансформација во Охридскиот Регион.
Се бара итно да се стават под привремена заштита Охридското Езеро, Студенчишко Блато, Студенчишки канал и Билјанини извори и да се воспостави целосна забрана за лов на пастрмка и белвица, сè додека не се изработи соодветна студија и не се усвојат законот и планот за управување со Охридското Езеро. Ова е уредено и со член 97 од Законот за заштита на природата.
„Да ѝ наложи на Владата итно да го актуализира процесот на усвојување на новиот закон за управување со природното и културното наследство во Охридскиот Регион. Имајќи предвид дека постојниот предлог-закон треба да претрпи одредена ревизија и нова јавна расправа (поради усвоениот план за управување), но сепак во најголем дел е готов документ, кој релативно брзо може да биде усвоен, сметаме дека ова е најсигурниот начин да се обезбеди законски обврзувачка и соодветна заштита на сите аспекти на светското наследство. Ова особено се однесува на воспоставување ефективно управувачко тело за регионот, со соодветна законски регулирана одговорност и отчетност“,
велат од „Фронт21/42“.
Според нив, фактот дека Охридскиот Регион ги задоволува критериумите да биде впишан во листата на светски наследства во опасност е поразителна вест, но влева надеж дека можеби на тој начин ќе се спаси ова природно и културно наследство.
„Секако, и по таквата одлука, вистинскиот спас ќе зависи од спремноста и способноста на власта да ја напушти праксата на манипулирање и навистина да ги спроведе предложените корективни мерки. Колку и светот да биде загрижен и посветен на зачувување на уникатното светско наследство, ако интересите на оние што ја водат државата се од поинаква природа и нивното исполнување зад себе остава пустош – навистина ќе бидеме првата генерација, откако постои човештвото, која на своите потомци ќе им го одземе највредното. Можеби еден ден на овие простори ќе живеат луѓе кои ќе разбираат што значи врвно светско богатство и ќе знаат како да остварат значителни економски придобивки токму преку чување и негување на неговите вредности. На потег е претседателот, кој има моќ и одговорност да спречи да им се уништи таа можност на сите идни генерации“,
велат од „Фронт 21/42“.
Сметаат дека свесно се крши Уставот, кој во член 118 вели дека меѓународните договори што се ратификувани се дел од внатрешниот правен поредок и не можат да се менуваат со закон.
„Од јуни 2017 година до денес, ‘грижата’ на нашите авторитети, и национални и локални, се сведува на трошење пари и време за да се изманипулира домашната и меѓународната јавност, додека паралелно продолжуваат да усвојуваат одлуки со кои се одобрува дополнително уништување на сериозно ранливите вредности на нашето најголемо природно и културно богатство. За три и пол години се спроведоа низа бесмислени и празни чекори, проформа се изработија и усвоија клучни документи и официјални одлуки, со цел да се ‘штиклира’ дека нешто е направено во дадениот рок. Се испратија државни извештаи до УНЕСКО, кои изобилуваат со лажни информации. Листата на обиди за манипулации на нашите ‘херои кои во Баку го спасија Охрид’ е многу долга“,
велат од „Фронт 21/42“.
Истовремено, додаваат дека продолжи легализирањето на дивоградбите во регионот, а се усвоија и одлуки со кои се потврди реализација на планираните проекти за плажите, нови пристаништа и платформа кај охридскиот аеродром. Измената на новиот закон за управување со Охридскиот Регион велат дека беше отворена вратата за урбаната мафија и продолжување на неефикасното управување, а откако тоа не успеа беше повлечен од собраниска процедура.
„Неформалната парламентарна група ‘Пријатели на УНЕСКО’, која освен што се рекламираше себеси, не направи ништо. Надзорната расправа за Законот за управување со Охридскиот Регион и спроведување на препораките, организирана од Комисијата за култура во претходниот парламентарен состав, со бомбастични заклучоци за кои немаше никаква намера и интерес да се спроведат. Општинските одлуки за мораториум, скроени да не го спречат реализирањето на планираните проекти. Неспроведливиот план за управување со Охридскиот Регион, исто така скроен да не ги спречи планираните проекти, да не наметне одговорност, усвоен со серија на законски прекршувања. Празните владини одлуки со наводни задолженија за општините и министерствата. Лажните информации во извештаите до УНЕСКО за (непостоечка) работна група и тендер за изработка на анализа на алтернативна рута на пругата од Коридорот 8, (непостоечки) Инвентар на дивоградби на Министерството за транспорт и врски, во соработка со општините и НП Галичица“,
ова се дел од примерите кои „Фронт 21/42“ ги наведува.