Општина Охрид во 2020 година поднесла 27 кривични пријави за бесправна градба, но ниту една не е процесуирана
Санкционирање на сите чинители што се дел од државните институции и не постапувале по законските обврски за заштитениот Охридски Регион, но и казни за оние кои градат бесправни објекти, е еден од првите чекори што треба да се направат, смета активистката Драгана Велковска, од невладината организација Охрид SOS.
Во дебата на Телма, Велковска го повика градоначалникот на Охрид, Константин Георгиески, да поднесе кривични пријави до сите кои бесправно градат објекти и со тоа го загрозуваат заштитеното подрачје.
Агресивната и непланска урбанизација беше нотирана и во последниот нацрт-извештај на УНЕСКО што пред неколку дена беше доставен до надлежните институции во земјава.
„Треба да се санкционираат сите, од вработените во државните институции и од највисоките раководства, па се до оние кои градат бесправно, бидејќи беспранвото градење е кривично дело. Во тој контекст го повикувам градоначалникот да поднесе кривични пријави за оние кои градат бесправно и за оние кои е констатирано дека граделе бесправно како на пример што хотелот во Лагадин кој веќе претставува споменик на нелегалната градба и е шампионско здание кое постојано е во процедура напред-назад со решенијата сè уште останува така“,
рече Велковска.
Георгиески вели пак, дека се сложува со неа за овој дел и посочи дека само во 2020 година до месец ноември, Општина Охрид има поднесено 27 кривични пријави за бесправна градба, а се подготвуваат уште тринаесетина, но вели дека тие не се процесуирани од обвинителството.
„Ниту една од пондесени кривични кријави не се процесуирани во обвинителството. Не знам зошто е така. Но, нас ние треба институционален пристап на решавање на проблемот. Ние како општина кога добиваме пријави постапуваме, донесуваме акти, меѓутоа, потоа посжчнува процесот на жалби и сето тоа се претвора во еден лавиринт. Откако завршува жалбената постапка ние поднесуваме кривични пријави, но процесуирањето е тешко“,
вели Георгиески.
Додава дека тој принцип на неказнивост си го прави своето и граѓаните гледаат дека не се казнуваат градителите на бесправни градби. па единственото нешто што на општината ѝ останува е за веќе изградените дивоградби да почне постапка за рушење.
„По добивањето на пријавите инспекторите постапуваат, честопати ги затвораме градилиштата и поставуваме жолта трака, меѓутоа инвеститорите или иведувачот ќе ја отстрани жолтата трака и тоа само по себе е кривично дело, па ние повторно носиме акти. Но, додека добиеме правосилно решение за рушење процесот е долг и сметам дека тука треба да се интервенира во Законот за градба за да можеме побрзо да постапуваме“,
вели Георгиески.