Договорот за економско нормализирање на односите меѓу Косово и Србија потпишан во Вашингтон, како исчекор во изнаоѓањето на конечен компромис, ќе придонесе за севкупната стабилност на регионот, порачал Пендаровски на средбата со Хоти
Глобалната пандемија не смее да биде пречка за унапредување на економските и трговските односи и за поддршка на планот на евроинтеграциите и спроведување на реформските процеси, порачал претседателот Стево Пендаровски на денешната средба со косовскиот премиер Авдулах Хоти.
На средбата, како што информира Кабинетот на претседателот, разменети се мислења за актуелните случувања во двете земји, за европската перспектива на државите од Западен Балкан, како и за мерките што се превземаат во справување со кризата од Ковид-19.
Пендаровски изразил уверување дека одличните односи меѓу двете земји ќе продолжат да се развиваат во духот на добрососедството и ќе бидат потврдени со конкретни иницијативи, кои ќе придонесат за просперитетен и стабилен регион и забрзана регионална соработка.
Во таа насока, соговорниците размениле мислења и околу можностите за продлабочување на билатералната и регионалната економска соработка, како и за поинтензивна комуникација помеѓу бизнис секторите на двете земји.
Пендаровски го поздравил и Договорот за економско нормализирање на односите меѓу Косово и Србија потпишан во Вашингтон, како исчекор во изнаоѓањето на конечен компромис, посочувајќи дека тој ќе придонесе за севкупната стабилност на регионот.