Градоначалникот на Штип вели дека платите на администрацијата, веројатно, нема да се намалуваат, ама дека се очекува намалување на реализацијата на проектите
Општините бележат пад на приходите во буџетите од крајот на март според оценките на градоначалниците од источниот регион. Градоначалникот на Општина Штип, Благој Бочаврски, како што пренесува МИА, потврдува дека има забележително намалување на приходите, а особено во ставката на даноци. Анализите за тоа колку се намалени средствата во буџетот ќе ги прават наредната недела, но смета дека во прашање нема да бидат доведени платите на администрацијата.
„Во делот на платите на вработените нема да дозволиме да се доведат во прашање, иако приходите се доста намалени. Но извесно е дека ќе имаме намалување на реализација на проектите. Тоа го кажувам јавно, а во текот на наредната недела ќе излеземе и со официјална бројка за тоа во кој обем се намалени буџетските средства“,
вели Бочварски
Тој апелира фирмите и граѓаните кои не се погодени од пандемијата да си ги плаќаат сметките кон комуналните претпријатија, но да го платат и данокот на имот, со цел побрзо да се реализираат одредени инфраструктурни проекти низ населбите.
Градоначалникот на Општина Карбинци, Јордан Насев, посочува дека во општинскиот буџет вообичаено во еден квартал имаат прилив на сопствени средства од 300.000 денари, но првиот квартал покажал дека овие средства се намалени и дека на сметката имаат околу 180.000 денари. Смета дека нема да бидат доведени во прашање капиталните инвестиции, бидејќи за нив овие средства доаѓаат од државниот буџет. Пролонгирање може да има само на барање на градежните компании, кои во овие моменти посочуваат дека главен проблем им е превозот на градежните работници од една општина во друга за време на полицискиот час.