Министерот за надворешни работи изразил благодарност за поднесената резолуција и порачал оти поддржана од сенатори од Демократската и од Републиканската партија, таа е дополнителна потврда дека македонскиот евроинтегративен процес нема алтернатива, но и дека е охрабрување до Европската Унија за забрзување на патот на С Македонија до нејзиното полноправно членство
Шефот на македонската дипломатија Бујар Османи денеска телефонски разговарал со демократскиот сенатор од Вермонт, Питер Велч, кој е еден од подносителите на резолуцијата во Сенатот на САД за поддршка на членството на земјава во Европската Унија.
Во телефонскиот разговор, како што соопштија од МНР, Османи изразил благодарност за поднесената резолуција и порачал оти поддржана од сенатори од Демократската и од Републиканската партија, таа претставува дополнителна потврда дека македонскиот евроинтегративен процес нема алтернатива, но и дека е охрабрување до ЕУ за забрзување на патот на С Македонија до нејзиното полноправно членство.
„Резолуцијата е уште една демонстрација за силната поддршката од САД за евроинтегративниот процес на С Македонија и доказ за силното сојузништво меѓу двете земји во исполнувањето на споделената стратешка цел – нашето членство во ЕУ. Тоа е и на линија на нашите заеднички заложби во рамки на Стратешкиот дијалог со САД, што го лансиравме со државниот секретар Блинкен во јуни 2022 г.”,
рекол Османи за време на телефонскиот разговор со демократскиот сенатор Питер Велч.
Дополнително, Османи и Велч го поздравиле напредокот на земјава во поглед на спроведувањето на реформите, поддршката на Украина, како и долгогодишното стратегиско партнерство меѓу двете земји и НАТО-сојузништвото.
САД го поддржаа пристапувањето на С Македонија во Европската Унија (ЕУ) во најнова резолуција во Сенатот, спонзорирана од демократскиот сенатор од Вермонт, Питер Велч, демократската сенаторка од Њу Хемпшир, Џин Шахин и републиканските сенатори од Небраска и Северна Каролина, Пит Рикетс и Том Тилис.
Во резолуцијата, Сенатот, меѓу другото, ги повика претседателот и државниот секретар на САД, како и европските сојузници, да се залагаат за отворање на првиот преговарачки кластер на ЕУ со Северна Македонија, без дополнителни билатерални услови.