Шефот на македонската дипломатија е оптимист дека засилената комуникација на политичко и експертско ниво ќе придонесе за решавање на несогласувањата
Неговата посета е претходница на средбата на премиерите Заев и Борисов, која треба да се случи пред 10 ноември
Министерот за надворешни работи Бујар Османи в петок ќе престојува во официјална посета на Бугарија на средба до шефицата на бугарската дипломатија Екатерина Захариева.
Ова ќе биде прва билатерална средба на Османи откако е министер за надворешни работи. Рече дека од средбата ќе испратат пораки за засилена соработка, заемна поддршка и европска иднина на двете земји.
Посетата на Софија, Османи ја опиша како остварување на неговиот прв приоритет од мисијата како предводник на дипломатијата – унапредување на добрососедските односи. Тој најави дека отворено ќе се разговара за сите прашања, за работата на мешовитата комисија и за отстранување на сите несогласувања преку засилена политичка и економска соработка меѓу двете земји.
„Фактот дека првата билатерална посета е во Софија е порака сама по себе. Тоа укажува дека одржувањето на односите со соседите е наш сериозен интерес и приоритет. Мислам дека интензитетот на комуникација на политичко ниво и на стручно ниво на кое инсистираме ќе ги отстрани предрасудите кои се создадоа во меѓувреме поради пандемијата и изборите и како резултат на ослабување на динамиката на комуникација. Очекувам по мојата средба, да следува средба меѓу премиерите, со што влегуваме во нов циклус на комуникација, а праксата покажува дека при добра комуникација се наоѓаат и решенија. Оптимист сум дека ќе ги надминеме евентуалните разлики што постојат. Иако рамката е во Договорот за добрососедство, ова е внесување нова енергија и динамика“,
рече Османи на денешната прес-конференција најавувајќи ја посетата.