Извршен е разговор и со преживеаните кои се во болница, а во истрагата се вклучени и нашите обвинители кои вчера биле на самото место, а во текот на денот разменувале информации и ќе продолжат да разменуваат, вели македонскиот министер за надворешни работи, кој денеска повторно отпатува за Софија
Истрагата за автобуската несреќа има врвен приоритет кај бугарското Обвинителство и се работи на тоа што побрзо да излезат со резултати, изјави министерот за надворешни работи, Бујар Османи, по средбата во Софија со бугарскиот главен обвинител надлежен за истрагата, додавајќи дека шпекулациите во врска со овој случај не помагаат во истражната постапка.
Османи нагласи дека на средбата со обвинителот станало збор за деталите околу идентификацијата и било договорено да се забрза постапката за собирање биолошки материјал од роднините на починатите во Скопје. Самата постапка на идентификација на загинатите, посочи шефот на дипломатијата, се очекува да трае најмалку седум дена.
„Процесот на идентификација, врз основа на ДНК материјали, ќе трае седум дена и тоа е важно за семејствата, важно е за државата во доменот на планирањето. Сакам уште еднаш да им се извинам на семејствата што не можевме да им дадеме и се уште не можеме да им дадеме индивидуални информации по однос на починатите, бидејќи мораме да го почекаме процесот на идентификацијата. Но ги замолив денеска да се вратат во Скопје, бидејќи сепак ќе требаат најмалку седум дена за да заврши тој процес. И откако ќе заврши идентификацијата на сите тела, тогаш МНР, односно државата, ќе ги преземе телата и ќе организира транспорт со погребни возила во Скопје и потоа од Скопје ќе можат да ги подигнат семејствата“,
рече Османи.
На средбата со истражниот обвинител станало збор и за истрагата за автобуската несреќа, но и за шпекулациите во јавноста. Притоа било нагласено дека шпекулациите не и помагаат на истрагата, дека се штетни, неточни и дека не се произлезени на никој начин од страна на самата истрага и од обвинителите.
„Во оваа фаза не можам да споделам се, меѓутоа е важно дека шпекулациите што ги има во јавноста се неточни, дека не треба да се продолжи со овој тренд на шпекулирање во однос на причините, бидејќи ја влошува и така тешката емоционална состојба на семејствата, меѓутоа и ја одлага самата истрага“,
рече Османи, прашан да сподели детали од разговорот за несреќата.
Извршен е разговор и со преживеаните кои се во болницата во Софија, а во истрагата се вклучени и нашите обвинители кои вчера биле на самото место, а во текот на денот разменувале информации и ќе продолжат да разменуваат.
„Добив впечаток дека е даден врвен приоритет овде во Обвинителството во Бугарија на оваа истрага и дека сериозно се зафатени што побрзо да излезат со резултати затоа што и тие се свесни – прво колку е важно брзо да заврши идентификацијата, телата да бидат предадени на семејствата, и второ – да се дадат конечните анализи за самата истрага“,
нагласи Османи.
Од бугарското Јавно обвинителство, појасни Османи, побарале разбирање, бидејќи овој процес е сложен и мора да биде соодветно процесиран за да може резултатите да бидат објективни.
Тој информира и дека е дозволена посета на дел од повредените кои се хоспитализирани во болницата во Софија, но не и на оние кои биле подложени на оперативен зафат, што претставува исклучок, бидејќи поради ковид-пандемијата во Бугарија има забрана за посета во болниците.