Сите седум пациенти ќе останат на болничко лекување до петок, а потоа ќе се направи план за нивен транспорт во Скопје, соопштија од МЗ по разговор на Филипче со директорот на болницата „Пирoгов“ во Софија
Во стабилна состојба се патниците што ја преживеаја големата автобуска несреќа во Бугарија и кои се моментно хоспитализирани во Софија, според информациите што ги добил македонскиот министер за здравство Венко Филипче во разговор со директорот на болницата „Пирогов“.
Од Министерството за здравство соопштија претпладнево дека министерот Филипче утрово разговарал со д-р Иван Поромански, директор на болницата „Пирогов“ во Софија, каде што се хоспитализирани седумте пациенти кои ја преживеаја стравотната сообраќајка што се случи вчера утрото на магистралниот пат „Струма“ на потегот Софија-Благоевград.
„Сите пациенти се стабилни и се под постојан лекарски надзор, а дадена им е и психолошка поддршка. На двајца пациенти им е извршен хируршки зафат, еден е опериран на ногата, а помал хируршки зафат е извршен кај девојка, на која ѝ е оперирано коленото. Тие се чувствуваат добро. Сите седум пациенти ќе останат на болничко лекување до петок, а потоа ќе се направи план за нивен транспорт во Скопје“,
соопштија од МЗ.