Министерот за надворешни работи вели дека институциите во Бугарија ја имаат започнато истрагата во која се очекува да бидат вклучени и наши експерти, како и експерти од судска медицина
Повредените во автобуската несреќа, според информациите на лекарите, се во добра здравствена состојба. Завршени се дел од операциите, а дел ќе бидат завршени денеска, изјави за МИА министерот за надворешни работи Бујар Османи пред болницата „Пирогов“ во Софија.
Османи кажа дека доаѓа во болницата да ги посети и да искомуницира со повредените, како и да ја олесни комуникацијата со семејствата и институциите во Бугарија, за да може да се забрза процесот на идентификација на жртвите.
Запрашан во врска со истрагата, тој посочи дека е таа започната од институциите во Бугарија.
„Мислам дека институциите во Бугарија ја имаат започнато. Тука се и нашите експерти и доколку треба да помогнат тука се и експертите од судска медицина. Очекуваме да бидат вклучени во процесот на идентификација. Важно е семејствата да бидат информирани на време и што побрзо да се заврши овој процес за да може посмртните останки на настраданите да ги пренесеме во Скопје“,
рече Османи.
Во однос на тоа што може да се направи на дипломатски план, Османи рече дека веќе се испратени двајца искусни дипломати во Амбасадата за да можат да им помогнат на луѓето.
„Денеска ќе бидам тука и јас, а веројатно и утре за да се олесни координацијата и комуникацијата. Многу е важно сѐ да се заврши навремено и луѓето да бидат информирани“,
нагласи Османи.
Тој потврди дека имаат помош од бугарските власт и се во постојана комуникација.
„Да, апсолутно уште вчера воспоставивме јасна координација меѓу институциите, цело време сме во комуникација и очекуваме така да продолжи и понатаму“,
рече шефот на дипломатијата
Во однос на информациите дека автобусот немал лиценца, Османи рече дека министерот за транспорт вчера имаше прес-конференција и кажа дека има три нивоа на сертифицирање – компанијата, возилото и возачот.
„Изгледа дека возилото не е регистрирано во нашиот центар, конкретното возило, а не на компанијата. Но, сепак, не очекувајте од мене такви детални информации, сепак мојата улога е поинаква во овој процес“,
истакна Османи.
Во одговор на новинарско прашање дали разговарал со повредените околу несреќата, Османи рече дека дел од нив се во тешка психичка состојба.
„Тие целосно ја паметат приказната, сето тоа што се случи. Дел од нив се во тешка психолошка состојба и им е потребна професионална помош. Затоа јас презедов обврска ако треба и од Скопје да донесеме експерти поради јазичните бариери, евентуално да можат да им помогнат луѓето да ја пребродат полесно состојбата. Сѐ што треба, ако проценат лекарите да донесеме од Скопје, ние тоа ќе го направиме. Затоа јас сум тука денеска за да олеснам секој вид координација“,
рече Османи.