Шефот на дипломатијата рече дека со бугарското МНР се воспоставени неколку директни линии на соработка, со вклученост на искусни дипломати и конзулари од различни директорати
Тројца лекари од Институтот за судска медицина во Скопје се очекува утре да се приклучат на експертскиот тим во Софија, кој ќе врши обдукција и идентификација на телата на загинатите македонски државјани во автобуската несреќа во Бугарија.
Како што соопшти министерот за надворешни работи Бујар Османи, на прес-конференција вечерва, нашите тројца експерти се веќе во Софија, со цел да помогнат за побрзо завршување на обдукцијата.
По известување од министерот за здравство и укажување од неговиот бугарски колега дека за нивен ангажман ќе биде потребна официјална нота од македонска страна, преку бугарското МНР до Обвинителството во Софија, тоа е, вели Османи, направено. Попладнево нотата е испратена со барање тројцата експерти на Институтот за судска медицина во Скопје да бидат дел од експертскиот тим за обдукција и идентификација на телата.
„Тоа барање е упатено конечно до Обвинителството, процедура која, сепак, според бугарските власти треба да се почитува и очекувам во текот на утрешниот ден Обвинителството да го одобри нивното вклучување во процесот на идентификација“,
рече Османи, на новинарско прашање, на заедничката прес-конференција со министерот за внатрешни работи, Оливер Спасовски и министерот за транспорт и врски, Благој Бочварски.
Османи истакна дека со бугарското МНР се воспоставени неколку директни линии на соработка, со вклученост на искусни дипломати и конзулари од различни директорати, со што се покриени сите потреби за координација на институциите и дипломатска активност на Министерството.
Тој соопшти дека со Бугарија веднаш беше договорена измена на ковид-протоколите, со што им се овозможува влез на сите блиски роднини на настраданите лица во тешката сообраќајна несреќа да патуваат за Софија, без да приложуваат било каков документ во врска со ковид-19, и дека е изготвен протокол за употреба на СОС телефонот во МНР, со цел да им се излезе во пресрет на големиот број барања на граѓаните за информации во врска со нивните најблиски.
Во амбасадата во Софија, рече Османи, се испратени и двајца искусни дипломати, како дополнително засилување во амбасадата, за да се олесни координацијата на активностите меѓу институциите овде во Скопје и во Софија, кои по завршување на процесот на идентификација ќе ја подготват и организираат постапката за пренос на телата на починатите.