Вицепремиерот за евроинтеграции Бујар Османи денеска исјави дека владата ќе ги почитува препораките на Венецијанската комисија за Законот за употреба на јазиците преку создавање капацитети, со цел имплементирањето на двојазичноста да не создава проблеми во општеството, но Законот нема да се менува.
– Можеби има различни интерпретации за начинот како ќе се имплементираат тие препораки. Венецијанската комисија вели не смее двојазичноста поради недостиг на капацитети да предизвикува одредени проблеми во судството. Затоа нашиот пристап ќе биде преку добри акциони планови да создаваме капацитети со цел двојазичноста полесно да се имплементира и да не предизвикува никакви проблеми во судството. Бидејќи, како што реков, колку што е важно правото за јазик, толку е важна и правната држава, рече Османи одговорајќи на новинарско прашање.
Според него нема големи разлики во ставовите на владините коалициски партнери ДУИ и СДСМ за ова прашање и притоа ги посочи изјавите на премиерот Зоран Заев и на вицепремиерката Радмила Шекеринска.
– Да повторам уште еднаш- три документи се во основа на државноста. Тоа се Преспанскиот договор, Договорот со Бугарија и Законот за јазици – документи кои се иреверзибилни и кои нема да бидат предмет на никакви промени и измени, ниту еднонасочни, ниту какви било промени, туку треба да се најде начин како да ја имплементираме намерата на Венецијанската комисија за создавање капацитети со цел имплементирањето на двојазичноста да не создава проблеми во општеството, рече Османи.
За најавата од ВМРО-ДПМНЕ дека ќе поднесат амандмани на Законот за употреба на јазиците, Османи упати на одговор од СДСМ, имајќи предвид дека станувало збор за исти амандмани што своевремено тие ги предложиле. ДУИ ќе даде коментар кога ќе бидат официјално предложени.
Откако Венецијанската комисија минатата недела во правното мислење предупреди дека со Законот за јазиците се наметнуваат нереални правни обврски за институциите, особено осврнувајќи се на примената на албанскиот јазик во судските постапки, премиерот Заев најави дека тој ќе претрпи ревизија. На ова жестоко реагираше вицепремиерот Османи кој предупреди дека секое отворање на Законот без консензус ќе значи враќање во 2001, пред Рамковниот договор. По прес-конференција на Османи и министерката за одбрана Радмила Шекеринска, но и премиерот Зоран Заев најавија дека власта заеднички ќе ги утврдува следните чекори околу Законот.
Лидерот на ВМРО ДПМНЕ Христијан Мицкоски најави дека целлта на амандманите што тие ќе ги поднесат ќе биде сегашниот неуставен закон, да го направат уставен.