Заедно ќе продолжиме да ги утврдуваме следните чекори поврзани со самото законско решение, заради тоа што дефинитивно никој од нас нема да дозволиме да бидеме наивни да отвораме повторно некои работи кои би можеле да нè поделат, порача премиерот Зоран Заев одговарајќи на новинарско прашање по прес-конференцијата на вицепремиерот Бујар Османи кој предупреди дека секое отворање на Законот за јазиците ќе нè врати пред 2001 година
„Секогаш сме биле конзистенти на изјавите и она што сакам уште еднаш да го реафирмирам во јавноста е дека многу убави работи се случија во последните две и пол години со кои што нашиот народ, сите етнички заедници, различни религиозни групи и секако различни културолошки наследства и сличности, успеа да се обедини во концептот на „Едно општество за сите“. Од сите тие работи овој Закон беше едната работа која нè обедини. Секако, како што рековме и претходно и така понатаму ние дадовме заеднички писма и дописи до Венецијанската комисија, Владата носеше одлуки, Парламентот го усвои претходно законот“, рече Заев.
Тој истакнал дека на внимателен начин и во иднина ќе се одлучува заради тоа што обединето и заедничко општество носи поквалитетен живот за сите граѓани во државата.
Венецијанската комисија, пред некој ден, предупреди дека со Законот за јазиците се наметнуваат нереални правни обврски за институциите, особено осврнувајќи се на примената на албанскиот јазик во судските постапки.
По ова, Заев вчера најави ревидирање на законот, согласно препораките на Венецијанската комисија, а Османи утрово порача дека „секој обид на Министерството за правда да направи измени без усогласеност на целата влада и без консензус во Собранието, ќе отвори спирала што ќе нè помести од патот по кој сме тргнале“.
Во соопштението кое беше објавено по состанокот на Венецијанската комисија, правните експерти на Советот на Европа подвлекуваат дека во одредени области новиот закон може да оди премногу далеку со наметнување на јавните институции на нереални правни обврски, особено во врска со употребата на албанскиот јазик во судска постапка, придружено со тешки санкции во случај на непочитување и можност за промена на судските решенија, доколку има недостиг на превод и толкување во текот на постапката.
Според мислењето на Венецијанската комисија, овој пристап би можел значително да го забави функционирањето на целото правосудство, ризикувајќи сериозни нарушувања на правото на фер судење, загарантирано со Европската конвенција за човекови права.
Комисијата понатаму забележува дека законот за јазици не е прецизен кои одредби важат само за албанскиот, а кои, исто така и за другите јазици на заедниците.
Почитување на мислењето на Венецијанската комисија бараше и Брисел уште при усвојувањето на предлог-законот за употреба на јазици од Владата во септември 2017 година.