По жестокиот прес на вицепремиерот Бујар Османи кој утрово предупреди дека секое отворање на Законот за јазиците ќе нè врати пред 2001 година, министерката за одбрана од редовите на СДСМ Радмила Шекеринска на прес-конференција кажа оти се надева дека партиите научиле нешто од минатото.
„Не веруваме во еднократно менување на овие важни закони, меѓутоа веруваме дека сите партнери во коалицијата ќе го почитуваме тоа што ме си го превзеле како обврска на почетокот. Сметаме дека ова не е прашање кое повторно треба да ја дели државата. Видовме како неодговорни политичари не доведоа на раб на војна, создавајќи страв кој беше нереален. Мислам дека државата, па и граѓаните, јас се надевам и некои од партиите научија нешто од тоа искуство“, порача Шекеринска.
Министерката посочи дека Владата претходно вклопила мислења на Венецијанската комисија во други закони. Владата сè уште ја чека целосната содржина на заклучоците на Комисија, па дури потоа ќе се произнесе дали и какви измени би имало.
„Она што можев да го прочитав во соопштението се однесуваше на голем прашалник околу судските постапки, а реков според тоа што го слушнав, во поглед на другите прашања Венецијанската комисија има полиберален став, така што тоа буквално ни дава шанса ако сакаме да најдеме добри решенија, да ги најдеме. Да кажеме дека и мислењето е почитувано, а и граѓаните да бидат задоволни. Не сме ја воделе работата со сила ниту претходно, не веруваме во таква политика, ниту денес, меѓутоа институциите ќе работат, а одлуките ќе се носат тогаш кога ќе биде јасно какво е мислењето, кои елементи се спорни, кои се позитивни“, вели Шекеринска.
Комисијата предупреди дека со Законот за јазиците се наметнуваат нереални правни обврски за институциите, особено осврнувајќи се на примената на албанскиот јазик во судските постапки.
Османи вели дека се барало толкување само на спорните делови од законот кои се однесуваат на примената на јазикот на банкнотите, за што Комисијата се изјаснила позитивно. Ако се отвори прашањето за судството, ДУИ бара инкорпорирање и на двојазични банкноти.
„Се согласуваме дека не смее ниту еден предмет да биде „жртва”, но кој треба да е фокусот, да го повлечеме Законот или да ги изградиме капацитетите? Логиката никогаш не била да се повлече еден закон, бидејќи нема капацитети. Венецијанската комисија не е супермаркет, не може да разговарате за судството, а да не разговарате за банкнотите“, вели Османи.
Вицепремиерот обвини дека претставничката на Северна Македонија во Венецијанската комисија, професорката Татјана Каракамишева, се обидувала да изврши притисок со цел Комисијата да се навлече да ја коментира и уставноста на Законот за јазиците.
Премиерот Зоран Заев вчера изјави дека власта ќе ги испочитува укажувањата на Венецијанската комисија и ќе го ревидира Законот. На тоа ќе работат надлежното Министерство за правда, заедно со експертите, на прецизен начин, како што тоа Венецијанската комисија го укажува, а потоа Законот ќе се прати во Собранието за негово донесување, рече Заев.
Опозициската ВМРО-ДПМНЕ смета дека Венецијанската комисија и нејзините ставови апсолутно се нешто што треба да е дел од законодавството во една држава од ЕУ, особено ако е аспирант за членство во ЕУ и очекува по подолг период да добие можеби датум за почеток на преговорите.
Венецијанската комисија пред неколку дена ги повика властите да го преиспитаат Законот за употреба на јазиците преку консултации со сите засегнати страни. Според соопштението, издадено по состанокот во Венеција, правните експерти на Советот на Европа подвлекуваат дека во одредени области новиот закон може да оди премногу далеку со наметнување на јавните институции на нереални правни обврски, особено во врска со употребата на албанскиот јазик во судска постапка, придружено со тешки санкции во случај на непочитување и можност за промена на судските решенија, доколку има недостиг на превод и толкување во текот на постапката.
Според мислењето на Венецијанската комисија, овој пристап би можел значително да го забави функционирањето на целото правосудство, ризикувајќи сериозни нарушувања на правото на фер судење, загарантирано со Европската конвенција за човекови права.
Комисијата понатаму забележува дека законот за јазици не е прецизен кои одредби важат само за албанскиот, а кои, исто така и за другите јазици на заедниците.