„Државата ги реши своите егзистенцијални прашања, ако можам така да кажам, внатрешно се консолидираше по однос на функционалната демократија и меѓуетнички односи, си ги среди односите во соседите, се етаблираше меѓународно. Сега останува корупцијата“, изјави шефот на дипломатијата Бујар Османи на денешниот брифинг со новинарите
Министерот за надворешни работи, Бујар Османи, смета дека фокусот на стратешките партнери на земјава сега е ставен врз корупцијата, оти се решени другите големи прашања. На денешниот брифинг со новинарите тој оцени дека тоа е позитивен развој на државата.
„Мислам дека и овој фокус на САД кон антикорупциската политика, не е одраз дека се случува нешто поинакво овде во однос на корупцијата, туку одраз дека влегуваме во една нова фаза на развојот на државата. Државата ги реши своите егзистенцијални прашања, ако можам така да кажам, внатрешно се консолидираше по однос на функционалната демократија и меѓуетнички односи, си ги среди односите во соседите, се етаблираше меѓународно. Значи ова е позитивен развој на државата и општеството во којшто останатите прашања кои ни беа фокус веќе се решени, сега останува корупцијата“
кажа Османи на денешниот брифинг со новинарите.
Тој вели дека земјата има заедничка определба со САД за засилена антикорупциска политика.
„Земјата влегува во таков еден модус на развој, во кojшто антикорупцискитa политикa ќе биде најважната, ако можам да кажам, и тукa ќе бидеме помогнати и мониторирани од двата стратешки партнери – ЕУ и САД“,
кажа Османи.
На дополнително новинарско прашање за изјавите на американската амбасадорка во земјава, Анџела Агелер, која јасно посочи дека корупцијата продолжува да го кочи напредокот на С Македонија, иако земјата чекори кон ЕУ, Османи вели оти не негира дека корупцијата е сериозен проблем.
„Апсолутно не негирам дека Република Северна Македонија има сериозен проблем со корупцијата, не само на политичко, на сите можни општествени нивоа, сектори, кадешто граѓаните бараат услуги. Овој фокус што го ставаме сега заеднички со нашите стратешки партнери е и резултат на решавање на тоа што големите прашања ги надминавме, кои нè дефокусираа од оваа политика на борба против корупцијата. Сега сметам дека е таков период, наредните години ќе бидат години на антикорупциска политика за државата да станува уникатен модел. Тоа што го создадовме во делот на мултиетничката демократија, култура на односи, на дијалог, создадовме сериозен модел на оваа држава во регионот, ни требаат уште сериозни институции во борбата против корупцијата и ние ќе бидеме такви какошто што очекуваат нашите пријатели и граѓаните. Затоа сметам дека ова е периодот кога фокусот треба да биде на антикорупциските политики“,
рече Османи.