Владини претставници денеска ќе имаат средба со функционери од Општина Битола на која ќе се зборува за состојбата на терен по силниот земјотрес, информираат од „Поинаку“
Советот на Општина Битола со писмен допис до Владата бара свикување итна седница на која ќе се разгледа состојбата во градот по силниот земјотрес и ќе се обезбедат средства за санација на штетите.
Во дописот се посочува дека земјотресот оштети поголем број објекти од кои дел се во надлежност и на централната власт.
„Бараме од Владата на РСМ да одржи итна седница на која ќе се разгледа состојбата во Општина Битола по земјотресот и да донесе одлука за обезбедување средства за санација на штетите предизвикани од земјотресот“,
се вели во дописот на Општина Битола испратен до Владата.
Од советничката група „Поинаку“ во соопштение до јавноста информираат и дека претставници на Владата денеска ќе се сретнат со градоначалникот, претседателката на општинскиот совет, како и пратеници од Битола.
„Владините претставници ќе ги добијат сите информации за состојбата на терен, како и за активностите што се преземени во претходните денови, ќе разговараме и за понатамошните постапки и начинот на кој заедно можеме да помогнеме на битолчани“,
велат од „Поинаку“.
По земјотресот, Советот донесе и одлука со која формираше Комисија за процена на штети, чија улога е да изврши проценка на штетите на домовите на граѓаните.