Коментирајќи ги критиките на „Алијанса за Албанците“ која го нарече „правобранител на Владата“, Зибери рече дека опозицијата нема ниту една основана забелешка за неговиот избор
Ќе се обидам институцијата народен правобранител да добие еден поинаков лик, порача омбудсманот Насер Зибери во гостување на Телма.
„Се согласувам дека често пати овие изјави се декларативни и дека нивната поткрепа низ мандатот спласнува, и полека граѓаните почнуваат да ја губат довербата. Но, јас во овој период што претстои ќе ги вложам сите мои ресурси, капацитети да ги демантирам и праксата и скепсата на сите тие што сметаат дека на ист начин ќе заврши и овој мандат на народниот правобранител“,
изјави Зибери.
На прашањето како ќе стекне доверба дека ќе ги штити граѓаните од системот на власта кога претходно бил во политика, а на последните избори и кандидат за премиер Албанец на предлог на ДУИ, Зибери рече дека пред се мора да се зајакнат инструментите за извршување на надлежностите на народниот правобранител.
Тој вели дека постои перцепција кај граѓаните дека народниот правобранител е семоќен, но вели дека мора да се зајакнат алатките за принуда на органите кои се потенцијални прекршувачи на правата на граѓаните за да може да има санкции.
„Народниот правобранител за да биде успешен во својата работа не треба да има предрасуди кога се поставува спротивно „визави“ органите на државната власт, министерствата и другите органи на управата. Правобранителот треба да делува од позиција што Уставот му ја гарантира и така да се постави за заштита на правата на граѓаните. Инфериорност визави органите на државната влас не треба да покажува. Постојниот закон мислам дека има преголеми овластувања, а премалку инструменти за реализација на надлежностите. Оттука по една добра анализа ќе составам тим во кои ќе бидат вклучени и невладините организации да се анализира применливоста на одредбите и да се најде решение за ефикасно извршување на надлежностите“,
рече Зибери.
Коментирајќи ги критиките од „Алијанса за Албанците“ која го нарече „правобранител на Владата“ и најави дека неговиот избор ќе го оспори пред Уставниот суд, Зибери рече дека опозицијата нема ниту една основана забелешка.
„Ниту еден субјект од опозицијата нема забелешки засновани по закон дека изборот на народниот правобранител не ги испочитувал пропишаните постапки утврдени со закон. Околу овој формален аспект мислам дека нема ниту една основана забелешка околу мојот избор, дури се отиде дотаму еден од членовите во Собранието кој случајно е во сродство со мене да се иззема од целата постапка за мојот избор. Околу стручноста, тоа е дискутабилно кој е инструмент за оценување на стручноста на кандидат за народен правобранител? Дали се тоа неговите стручни способности стекнати со квалификации, кои како дипломиран правник со долгогодишно искуство е несомнено дека ги имам, дали мојот ангажман во општеството досега, значи тоа е дискутабилно кое не е уредено со закон врз основа на кој ќе се оцени стручноста“,
рече Зибери.
Тој вели дека главните забелешки биле од политички аспект, односно дали еден можен кандидат за премиер може да биде заштитник на правата и слободите на граѓаните. Сепак, уверува дека ќе биде независен.
„И тоа е политичко и морално прашање. Со тоа прашање јас сум расчистил бидејќи сум цврсто на стојалиште дека без пардон ќе се вклучам во процесот и нема да има никаво алиби доколку не бидам успешен. Било кој носител на орган на управа кој подпаѓа под моја надлежност нема да биде амнестиран, напротив постапките ќе се водат без разлика кој е“,
рече Зибери.