Обединетите нации се ангажираат на намалување на тензиите меѓу Израел и Палестинците, а генералниот секретар Антонио Гутереш изрази жалење за големиот број жртви, меѓу кои има и деца, настрадани во израелските воздушни напади врз Газа и ракетните напади на Хамас врз Израел, изјави денеска претставникот на ОН, Стефан Дижарик.
„Израелските сили за безбедност мора да бидат максимално воздржани и мора да го прилагодат степенот на употреба на сила. Ракетирањето и гранатирањето на Хамас во населените области во Израел се неприфатливи”,
рече Дижарик.
Сите летови на аеродромот Бен Гурион во Тел Авив вечерва се прекинати поради ракетен напад од Појасот Газа, соопштија властите. Палестинската група Хамас соопшти дека истрелала 130 ракети кон Тел Авив, а во градот се слушаат сирени за тревога.
Локалните медиуми јавуваат дека еден проектил завршил во станбена зграда во близина на Тел Авив. Според последните информации една жена загинала, а неколкумина се повредени, меѓу кои и петгодишно девојче.
Ова резултираше со вкупно три лица убиени денеска во ракетни напади од Појасот Газа кон Израел. Според израелската армија, повеќе од 500 ракети биле истрелани кон Израел од различни палестински групи од синоќа.
Станбена зграда од 13 ката се урна во Појасот Газа по воздушниот напад на Израел во која била канцеларија на политичкото раководство на исламистичката група Хамас, што управува со Појасот Газа.