Од ОЈО велат дека за некои од починатите ќе биде потребна ДНК анализа за да се утврди нивниот идентитет
Издадена е наредба за обезбедување на снимките од видеонадзорот во и околу објектот, сослушани се вработените, а со увидот ќе се продолжи и во текот на денешниот ден
За вршење непосреден увид на местото на трагичниот настан во модуларната болница во Тетово, покрај тројца обвинители од Основното јавно обвинителство во Тетово, синоќа излегоа и двајца обвинители од Основното јавно обвинителство од Скопје. На местото на настанот беше и јавниот обвинител на Република Северна Македонија, кој присуствуваше и на состанокот на Кризниот штаб, информираат утрово од ОЈО.
Во соработка со припадници на МВР веднаш е започнат увидот, а издадени се наредби за обдукција и идентификување на телата на 14 лица починати во пожарот, додека се испитува и дали има и други починати лица. За некои од починатите ќе биде потребна ДНК-анализа за да се утврди нивниот идентитет. Според првичните сознанија, меѓу починатите нема медицински персонал.
„До раните утрински часови, обвинителите сослушаа вработени во модуларната болница со цел да се утврдат причините за пожарот. Во исто време, издадена е наредба за обезбедување на снимките од видеонадзорот во и околу објектот. Увидот ќе продолжи и во текот на денешниот ден, а јавните обвинители заедно со експертите на МВР, ќе ги обезбедат доказите за целосно расчистување на трагичниот настан“,
соопшти ОЈО.
Министерот за здравство Венко Филипче синоќа објави дека досега се утврдени 10 жртви, но дека бројката може да порасне. ПО состанокот на Кризниот штаб во Тетово, градоначалничката Теута Арифи рече дека нема да се даваат изјави се додека не заврши истрагата.