Одлуката за санкции на ЕУ не се однесува за настани од мултилатерален карактер како што е ОБСЕ. Оттука е одлука на владите да донесат, меѓутоа правна основа во ЕУ има. Е сега таква одлука треба да донесеме ние и најмалку уште една земја од нашите соседи – Бугарија или Грција за да може да се обезбеди прелет, вели Османи
Одлуката на Европската Унија за санкции за прелети на руски авиони не се однесува на настани кои се од мултилатерален карактер како што е ОБСЕ, вели шефот на дипломатијата Бујар Османи во однос на доаѓањето на рускиот министер за надворешни работи Сергеј Лавров на Министерскиот состанок на ОБСЕ во Скопје на крајот на месецов.
Османи очекува на Министерскиот состанок на ОБСЕ во Скопје да бидат присутни сите министри.
„Одлуката за санкции на ЕУ не се однесува за настани од мултилатерален карактер како што е ОБСЕ. Оттука е одлука на владите да донесат, меѓутоа правна основа во ЕУ има. Е сега таква одлука треба да донесеме ние и најмалку уште една земја од нашите соседи – Бугарија или Грција за да може да се обезбеди прелет. Меѓутоа, во оваа фаза ги процесираме барањата и за неколку дена ќе излеземе со конечен став“,
рече Османи.
Тој нагласи дека се процесирани сите барања за визи за државите каде што има потреба од визи. Одлуката е на Република Северна Македонија, а кога ќе биде донесена ќе бидат информирани граѓаните.
Прашан дали треба одобрение од НАТО за доаѓањето на Лавров, тој рече дека нема потреба за консултации со НАТО по однос на ОБСЕ бидејќи Алијансата не е страна во организацијата.
„Одлуката е на Република Северна Македонија по однос на присуството, согласно одлуката на ЕУ за санкционирање на одредени лица, нашето приклучување како тоа се реперкуира врз учеството, присуството итн. Затоа, наредните денови ќе излеземе со конечен став како ќе одговориме на барањето за учество на делегацијата, во кое ниво и во колкав број. Јас реков се надевам дека ќе успееме на крај сите да бидеме присутни во Скопје“,
рече шефот на дипломатијата и претседавач со ОБСЕ.
На прашањето што доколку некоја од другите земји членки на ОБСЕ се спротивстави на учеството на Лавров, Османи кажа дека и тоа го следат внимателно.
„Јас веќе кажав јавно, една од причините зошто допатував до Киев беше да разговарам и по однос на ставот на Украина во таков услов. Сè уште разговараме со сите земји учеснички за да обезбедиме присуство на сите“,
изјави Османи.
Во однос на доаѓањето на државниот секретар на САД, Ентони Блинкен, Османи повтори дека се очекува негово учество.
„Немам индикации досега дека нема да дојде. Значи, ние се спремаме за доаѓање на државниот секретар на САД“,
додаде Османи.