„Оваа тема ако се отвори тогаш ќе треба да проверите и во Академијата на судии, кој сè станува судија и обвинител, како и да проверите по министерствата. Таму на времето имаше еден поранешен министер, кој сега е многу гласен, кој дури и бебисистерката си ја вработи во Министерство за надворешни работи“, рече Ковачевски
Не можам да бидам портпарол на семејства на други луѓе ниту, пак, сум претендирал да бидам тоа, рече премиерот Димитар Ковачевски одговарајќи денеска на новинарско прашање за вработувањата на роднини на министри во Македонска навигација (М-НАВ).
Ковачевски, упатувајќи ги новинарите одговорите да ги бараат кај оние што имаат роднини вработени во М-НАВ, рече дека министрите што имале некој вработен во М-НАВ веќе ги даваат своите ставови.
„Јас имав принципиелен став во однос на М-НАВ и гледам дека министрите што имале некого вработено во М-НАВ веќе си даваат свои ставови. Јас не можам да бидам портпарол на семејства на други луѓе ниту, пак, сум претендирал да бидам тоа. Оваа тема ако се отвори тогаш ќе треба да проверите и во Академијата на судии, кој сè станува судија и обвинител, како и да проверите по министерствата. Таму на времето имаше еден поранешен министер, кој сега е многу гласен, кој дури и бебисистерката си ја вработи во Министерство за надворешни работи. Така што тоа е една карактеристика на општество во транзиција. Такви се сите општества во транзиција“,
рече Ковачевски одговарајќи на новинарски прашања по потпишувањето на договорот за изградба на Ресурсен центар за повратници и други ранливи категории на граѓани.
Според Ковачевски, доаѓа време кога професионализмот ќе биде клучен при вработувањата.
„Ова е држава која се развива, држава која многу се разликува од тоа што беше пред 32 години кога ја добивме нашата независност и сметам дека професионалците, без разлика на било која припадност ќе бидат тие кои државата ќе ја водат во иднина и до полноправно членство во ЕУ и до земја која ќе има најголем раст од сите земји членки откако ќе влезе“,
рече Ковачевски
Изминатите денови дел од медиумите излегоа со информација дека во М-НАВ се вработени и роднини на вицепремиерот за политички систем и односи меѓу заедниците, како и на министрите за надворешни работи и за земјоделство, шумарство и водостопанство.
Денеска, министерот за земјоделство, шумарство и водостопанство Љупчо Николовски влезе во расправија со новинарите кога, на настан организиран од неговото министерство во делот на одговарање новинарски прашања, го прашаа како ќе ја убеди јавноста дека не станува збор за непотизам и дека тој и неговата функција немале никакво влијание за тоа што чичко му работи во М-НАВ, а исто така е вработен и негов братучед, кој не успеал од првпат да го положи испитот.
Николовски одговори дека неговиот чичко бил вработен во М-НАВ уште пред тој да се роди, а за неговиот братучед рече дека е лице кое е највисоко стручно посветен кадар, школуван во Јапонија, во Кина и во Словенија којшто после 20 години се вратил во земјата.
Премиерот Димитар Ковачевски минатата недела одговарајќи на новинарски прашања во врска со инцидентот во М-НАВ, изјави дека Македонската навигација е на ниво на семејна фирма во која има вработувања до трето колено и дека затоа таму се случуваат конфликти кои обично ги има по дома. Поради тоа, рече тој, Владата и Еуроконтрол треба посериозно да се занимаваат со оваа институција и да се испита начинот на кој се прават конкурсите за вработување, како и критериумите и начинот на селекција на кандидатите.
Претседателот на Струковиот синдикат на контролори на летање Александар Тасевски во интервју за „Топ тема“, рече дека не се плаши од најавените трудови инспекции и повика тие да почнат од него, но потоа инспекцијата да спроведе контрола и врз останатите вработени. Како што истакна, интересот за вработување во М-НАВ е за местата кои имаат многу мала или никаква одговорност.
Тој додаде оти му е јасно дека тој ќе биде на тапет затоа што, како што рече, случувањето во М-НАВ не им одговара на многу луѓе.
По инцидентот од 4 јануари со упадот во објектот на Контролата на летање и напад на вработените, што се случија по реакциите и оспорувањата од Синдикатот за спроведувањето на последниот оглас за вработување и работата на раководството на М-НАВ, Владата на седница, минатиот вторник даде насоки надзорниот одбор на М-НАВ да ги разреши претседателот на Управниот одбор на М-НАВ, Фахрудин Хамиди, и секторскиот извршен директор во М-НАВ, Љубе Стаменковски, а на нивните места да ги именува Хекуран Асани, односно Милан Кораќ.
За упадот во Македонската навигација, осомничени се вкупно осум лица, од кои петмина се достапни за истражните органи и на нив им е одреден 30-дневен куќен притвор. Меѓу нив е и шефот на партискиот огранок на ДУИ во Чаир, ексминистер и вработен во М-НАВ, Беким Незири. По останатите тројца полицијата и понатаму трага.