Премиерот најави дека во своето обраќање пред европските и регионалните лидери ќе ја потврди силната посветеност на македонската влада на реформската агенда и евроинтеграцискиот пат
Премиерот Христијан Мицкоски очекува силни пораки за интеграцијата на Западен Балкан во Европската Унија, како и суштински дискусии и конкретни резултати од денешниот Самит на Берлинскиот процес што се одржува во Свети Стефан, Црна Гора.
Пред почетокот на самитот, Мицкоски истакна дека македонското досие е комплексно, но дека земјата одамна го заслужила својот напредок на патот кон ЕУ.
„Денеска очекувам многу силни пораки во однос на интеграцијата на Западен Балкан во ЕУ. Секако, тука ја вклучувам и мојата земја. Досието на Македонија е многу сложено. Одамна заслуживме да бидеме дел од ЕУ, но, за жал, поради одредени вештачки причини, сè уште не сме во можност да ги започнеме преговорите“,
изјавил Мицкоски пред почетокот на Самитот.
Премиерот најави дека во своето обраќање пред европските и регионалните лидери ќе ја потврди силната посветеност на македонската влада на реформската агенда и евроинтеграцискиот пат.
Притоа, тој ги истакна и актуелните глобални предизвици, меѓу кои ги посочи војната во Украина, војната со Иран, кризата на финансиските пазари и протестите низ Европа.
Тој изрази надеж дека денешните разговори во рамките на Самитот на Берлинскиот процес ќе бидат суштински и ќе резултираат со конкретни и плодни резултати.
Самитот на Берлинскиот процес е завршен настан од претседавањето на Црна Гора, а ќе го отвораат црногорскиот премиер Милојко Спајиќ и германскиот канцелар Фридрих Мерц.
Во рамките на Самитот ќе се одржи и пленарна сесија „Регионот во движење: Западен Балкан ја обликува заедничката иднина на Европа“.
Германската влада соопшти дека главни теми ќе бидат економскиот раст, конкурентноста и безбедноста, додека Црна Гора за време на своето претседавање како четврт клучен приоритет ја постави зелената и одржлива транзиција.