Портпаролката на ВМРО-ДПМНЕ, Марија Митева, ѝ порача на градоначалничката дека наместо неосновани пресметки и упади на прес-конференции треба да почне реализација на проекти и со решавање на потребите на скопјани
Скопската градоначалничка Данела Арсовска повеќе ја нема поддршката од ВМРО-ДПМНЕ освен за оние проекти кои беа промовирани во време на изборите.
Портпаролката на ВМРО-ДПМНЕ, Марија Митева, вели дека поддршката што ја даде партијата на почетокот кон Арсовска е темелена на принципи и секако дека таа поддршка ќе се повлече кога принципите нема да се почитуваат.
„Причините поради кои функционерите од ВМРО-ДПМНЕ поднесоа оставки ги видовме во јавноста преку нивните изјави. Но, како партија која го поддржа концептот за модерно Скопје и која застана со поддршка зад независната кандидатура на Арсовска искрено верувајќи во овој концепт, можам да кажам дека не сме задоволни од досега сработеното од градоначалничката и сметаме дека малку е реализирано, а може и треба да се испорачаат многу повеќе резултати кои ги заслужуваат скопјани. Поддршката која ја дадовме на почетокот кон Арсовска е темелена на принципи и секако ние таа ќе ја повлечеме тогаш кога ќе видиме дека тие принципи не се почитуваат“,
појасни Митева.
Митева додаде дека во иднина ќе ги поддржуваат само оние проекти, само онаа политика која е во функција на концептот модерно Скопје и која ќе биде одобрена и изгласана во Советот, но исто така вели дека партијата ќе го задржи правото да биде жесток критичар на нејзините политики кои излегуваат надвор од тој концепт ветен пред граѓаните.
Портпаролката ѝ порача на градоначалничката дека наместо неосновани пресметки и упади на прес-конференции треба да почне реализација на проекти и со решавање на потребите на скопјани.