„На ден 20 јули 2022 година формирана е комисија за вршење на стручен надзор, а во врска со примената на методот на хемофилтрација при лекувањето на пациентите со ковид-19 во приватната здравствена установа „Клиничка болница Жан Митрев“, Скопје. Во следниот период Министерството за здравство ќе направи анализа на добиените извештаи по која ќе бидат преземени сите потребни мерки и активности согласно законските овластувања“, велат од Владата по денешната седница
Министерот за здравство, Беким Сали, денеска ѝ реферирал и на Владата за случајот „Клиника Жан Митрев“ што го обелодени „Истражувачка репортерска лабораторија“ (ИРЛ).
Од Владата информираа дека на денешната седница е разгледана и усвоена Информацијата на Министерството за здравство според која на 18 јули 2022 година (понеделник) доставена е ургенција до Лекарската комора по однос барањето да се изврши стручен надзор за лекувањето на пациентот Никола Брезев (како дел од сторијата на ИРЛ), а врз основа на доставената иницијатива за стручен надзор од Државниот санитарен и здравствен инспекторат (ДСЗИ).
Министерството ја информирало Владата дека било побарано од ДСЗИ да изврши вонреден инспекциски надзор во ПЗУ „Клиничка болница Жан Митрев“ – Скопје, во однос на спроведувањето на одредбите од задолжителното пријавување интрахоспиталните инфекции, примената на одредбите од Законот за евиденции во областа на здравството, како и комплетен инспекциски надзор согласно законските овластувања на инспекторатот.
Од инспекторатот бил побаран и извештај за спроведените редовни и вонредни инспекциски надзори во приватните болници во земјава за период 2019 – 2022 година.
„Од Агенцијата за лекови и медициски средства МАЛМЕД, како надлежна иснтитуција согласно Законот за лекови и медицински средства за постапката за спроведување на клинички испитувања за лекови/медицински средства, беше побарано да се направи инспекциски надзор по однос на почитување на одредбите од Законот за спроведување на клиничките испитувања за примената на хемофилтрацијата при третман на ковид-19 пациенти“,
известуваат од Владата.
Оттаму информираат дека на 19 јули 2022 година ДСЗИ го доставил овој извештај според кој во тековниот период направени биле 45 редовни и 52 вонредни инспекциски надзори во вкупно 12 приватни болници при што биле издадени 11 решенија за констатирани недостатоци во надлежност на инспекторатот.
„На ден 20 јули 2022 година формирана е комисија за вршење на стручен надзор, а во врска со примената на методот на хемофилтрација при лекувањето на пациентите со ковид-19 во приватната здравствена установа „Клиничка болница Жан Митрев“, Скопје. Во следниот период Министерството за здравство ќе направи анализа на добиените извештаи по која ќе бидат преземени сите потребни мерки и активности согласно законските овластувања“,
соопштуваат од Владата.
Инаку, истражувањето на новинарите од ИРЛ покажува дека приватната болница која прими најмногу пациенти за време на ковид-19 пандемијата и во која лекувањето чинеше десетици илјади евра, го применувала методот хемофилтрација (филтрирање на крвта) кој, практично, бил клиничка студија. Наспроти домашното законодавство, клиничките студии не биле пријавени и одобрени од МАЛМЕД.