Од утре се намалуваат рестрикциите на движење и полицискиот час секој работен ден ќе трае од 19 до 5 часот, одлучи Владата.
За лицата над 67-годишна возраст ќе биде дозволено движење секој работен ден од 5 часот наутро до 12 напладне. Младите лица до 18 години ќе може да излегуваат од понеделник до петок од 13 до 19 часот.
Со владината одлука се намалува и ограничувањето на движење за време на викендите.
Отсега забраната за движење за викенд ќе почнува од 15 часот во сабота, а ќе трае до понеделник до 5 часот наутро.
Во сабота, за лицата над 67-годишна возраст, ќе биде дозволено движење од 5 часот наутро до 11 часот наутро. Младите лица до 18 години, пак, ќе може да излегуваат од 12 до 15 часот.
Најавувајќи го скратувањето на полицискиот час, министерот за здравство Венко Филипче вчера рече дека релаксирањето на мерките е на препорака на Комисијата за заразни болести, која побара да се воведе задолжително носење заштитна опрема при движење во затворени простории или јавни површини каде што нема можност за држење физичка дистанца од два метра.