Според одговорот што го добивме од Јавното обвинителство, оттаму индиректно ја повикуваат и ја потсетуваат опозициската партија дека ако има сознанија за сторено кривично дело има обврска да го пријави до надлежните органи
„Јавното обвинителство ги следи информациите и ќе постапи доколку бидат утврдени елементи на кривично дело. Воедно, секој што има какви било сознанија за сторено кривично дело има обврска да ги пријави на надлежните органи“, стои во одговорот од Јавното обвинителство на прашањето на „360 степени“ дали надлежно јавно обвинителство ја следи аферата „Броило“ и дали ќе отвори или можеби веќе отворило постапка по допрен глас по изнесените наводи од страна на ВМРО-ДПМНЕ
Јавното обвинителство ги следи информациите и ќе постапи доколку бидат утврдени елементи на кривично дело, велат во одговорот од Јавното обвинителство на прашање на „360 степени“ дали надлежно ЈО ќе отвори постапка по допрен глас за аферата „Броило“, како што вчера побараа од опозициската ВМРО-ДПМНЕ, која ја отвори аферата со која тврди дека премиерот Димитар Ковачевски и неговиот кум на сомнителен начин заработиле 26 милиони евра.
Според одговорот што го добивме од Јавното обвинителство, оттаму индиректно ја повикуваат и ја потсетуваат опозициската партија дека ако има сознанија за сторено кривично дело има обврска да го пријави на надлежните органи.
„Јавното обвинителство ги следи информациите и ќе постапи доколку бидат утврдени елементи на кривично дело. Воедно, секој што има какви било сознанија за сторено кривично дело има обврска да ги пријави на надлежните органи“,
стои во одговорот од Јавното обвинителство на прашањето на „360 степени“ дали надлежно јавно обвинителство ја следи аферата „Броило“ и дали ќе отвори или можеби веќе отворило постапка по допрен глас по изнесените наводи од страна на ВМРО-ДПМНЕ.
Од ВМРО-ДПМНЕ вчера преку соопштение ги повикаа Државната комисија за спречување на корупција (ДКСК) и Јавното обвинителство да отворат случај за премиерот Димитар Ковачевски и неговиот кум за аферата „Броило“.
„ДКСК и ЈО да се охрабрат и да отворат случај за Димитар Ковачевски и неговиот кум Паунов кои на сомнителен начин заработиле 26 милиони евра. Ковачевски и Паунов злосторнички се здружиле и 5 месеци откако антимакедонската СДС е на власт во 2017 година ја основале ‘Пискел груп’. Во рок од една година Ковачевски и Паунов отвораат фабрика за производство на фотоволтаични панели, а преку државна помош зеле 2 милиони евра, додека пак во период кога Ковачевски е заменик министер за финансии, фирмата на кумот на Ковачевски прави договор со ЕВН во вредност од над 2 милиони евра. Институциите да не го оправдуваат криминалот на Ковачевски и Паунов и веднаш да отворат случај по допрен глас“,
наведоа вчера од ВМРО-ДПМНЕ.
Претходно во понеделникот претседателката на Државната комисија за спречување корупција (ДКСК), Билјана Ивановска, изјави дека нема основа за покренување постапка за судир на интереси против премиерот Димитар Ковачевски, откако опозициската ВМРО-ДПМНЕ ја прозва Комисијата да отвори предмет за аферата „Броило“.
„Кога стапи на функција заменик-министер за финансии, премиерот Димитар Ковачевски во својот анкетен лист уредно пријави сѐ што поседува. Од податоците во анкетниот лист имаме сознанија дека тој не учествува во управувањето, а ги продал и сопственичките удели во фирмата. Оттука нема основа за покренување постапка за утврдување судир на интереси. Согласно Законот за спречување корупција и судир на интереси, функционерот кога стапува на функција управувањето на фирмата треба да му го довери на друго лице кое не е член на неговото семејство. Во случајов тој не е ниту сопственик ниту управител“,
изјави Ивановска за МКД.мк.
Ставот на Ивановска предизвика жестоки реакции од ВМРО-ДПМНЕ и од нејзиниот лидер Христијан Мицкоски, кој коментирајќи ја изјавата на претседателката на Антикорупциска рече оти се надева дека нема така експресно да дејствуваат како што тоа го направија во овој случај предвреме и дека сериозно ќе му пристапат на овој случај.
Од опозициската партија и денеска ја „нападнаа“ ДКСК. Утрово преку соопштението од ВМРО-ДПМНЕ наведоа дека Антикорупциска ја презела улогата на адвокат на Ковачевски и побрзала предвреме да го амнестира Ковачевски од аферата „Броило“ тешка 26 милиони евра.
„Ни постапка ни аргументи ни факти не посочија, туку само посочија дека Ковачевски според нив не бил виновен. Ова отвора сомнеж дека ДКСК позната како Антикорупциска комисија е само продолжена рака која го штити криминалот и ја амнестира корупцијата. После да не се чудат институциите за борба против корупција зошто огромно мнозинство од граѓаните не им верува“,
велат од ВМРО-ДПМНЕ.
Неколку часа подоцна пратеникот и член на извршниот комитет на ВМРО-ДПМНЕ, Миле Лефков поднесе претставка до ДКСК, за, како што рече, да им дадат можност да се поправат и наместо да потклекнат под политички притисок за аферата „Броило“, да ги согледаат фактите и да донесат одлука врз основа на закон“.
„Залудни им се сите обиди да го амнестираат премиерот, кога тој потоа излегува на емисија и признава дека во време додека бил заменик министер за финансии, исплаќана е државна помош на фирмата основана од него, а сега водена од неговиот кум, Пиксел груп. Но да почнеме со ред и полека, за да може ДКСК да разбере: 1. Ковачевски и неговиот кум ја основаат Пиксел груп пет месеци откако СДС формира влада во 2017 година. Од тука почнува аферата Броило и создавањето на соларниот картел кој до сега е влезен во бизниси од над 26 милиони евра. 2. За само една година, Пиксел груп гради фабрика за изработка на фотоволтаични панели. 3. Во истиот период КМГ ЕОЛ Квазар, сопственост на кумот на Ковачевски добива државни тендери во висина од 2 милиони евра, и тоа за поставување на соларни панели, кои ги прави Пиксел груп. Од тука почнуваат сомнежите за злосторничко здружување. 4. Ковачевски станува заменик министер за финансии, а КМГ ЕОЛ Квазар склучува договор со ЕВН од над 2 милиони евра, повторно за монтирање на фотоволтаични панели, која самата не ги изработува, туку ги изработува Пиксел груп основана од Ковачевски. Тргувањето со влијание е впечатливо. 5. Ковачевски станува премиер во јануари 2022 година. Четири месеци подоцна во Бугарија се отвора фирма од бугарски граѓани под името Солар Хорајзон. Во август 2022 бугарската фирма доаѓа во Македонија и заедно со Пиксел груп основана од Ковачевски почнуваат инвестиција во фабрика во ТИРЗ Тетово во вредност од 54 милиони евра. И во целиот овој период од 5 години, Пиксел груп на Ковачевски добива државна помош, и во време кога Ковачевски е заменик министер за финансии, факти кои и самиот тој ги признава. Но и во време додека е мандатар за избор на нова влада, кога на Пиксел груп и се префрлени над 200 илјади евра. Дали се потребни уште докази?“,
изјави Лефков пред седиштето на ДКСК.
Опозициската ВМРО-ДПМНЕ пред десетина дена излезе со обвинувања до премиерот Димитар Ковачевски и аферата „Броило“, како што ја нарекоа од партијата.
Во текот на минатата и оваа недела од опозициската партија одржаа серија прес-конференции на кои изнесoa обвинувања за активностите на фирмите основани од премиерот Ковачевски и неговиот кум, меѓу кои и тврдења дека компаниите добивале државни тендери во износ од неколку милиони евра.
Премиерот Ковачевски минатата недела, одговарајќи на новинарски прашања, ги оцени како очаен обид обвинувањата на опозициската ВМРО-ДПМНЕ и побара од лидерот на опозицијата Мицкоски и членовите и пратеници на ВМРО-ДПМНЕ, кои излегоа со аферата „Броило“, да му се извинат, инаку, како што индиректно најави, ќе бара одговорност од нив врз основа на законските регулативи во државава.
Ковачевски, кој денеска присуствуваше на отворање на фабриката „Магна мирорс“ во Струга во контекст на обвинувањата од ВМРО-ДПМНЕ во аферата „Броило“, изјави дека „сите сте сведоци дека 10 дена ме критикуваат луѓе кои никогаш во животот не кренале ништо потешко од спојувалка“.
„Сите вие следите дека десет дена за мене се зборува дека сум правел фабрика, сум работел во фабрика. И јас сум горд што сум работел во фабрика исто како и вие што работите. И многу ми е познато и добро знам што е антистатикот, што значи загревање на ваков погон и како се организира производствен процес во една високотехнолошка индустрија како што е оваа. А, ме критикуваат луѓе кои никогаш во животот не кренале ништо потешко од спојувалка и за кое кревање спојувалка им плаќаат оние како вас и мене кои работат, креираат вредност и плаќаат даноци“,
рече Ковачевски на отворањето на канадската компанија „Магна мирорс“ во Струга.
По обвинувањата на ВМРО-ДПМНЕ компаниите „Пиксел груп“ и „КМГ ЕОЛ квазар“ излегоа со заедничко соопштение во кое најостро го осудија „секој обид за дискредитација и обид за нашата групација да се доведе во корелација со каква било политичка структура“.