Јанакиески пред неполн месец призна вина за повеќето дела за кои се гонеше во „Титаник“ и доби пресуда од првостепениот суд со која е осуден на затворска казна од 4 години и 6 месеци
Обвинителката Лиле Стефанова се откажа од прогон за ексминистерот за транспорт и врски, Миле Јанакиески, во случајот „Титаник“ – за единственото дело за кое тој не призна вина.
Откако обвинителството се откажа од прогон, судечкиот совет на чело со судијата Осман Шабани, на денешното рочиште, го констатирало потегот на обвинителството и донело одбивателна пресуда што значи дека Јанакиески повеќе нема да седи на обвинителна клупа во овој предмет, со оглед дека не преостануваат други кривични дела за кои тој се гонеше во „Титаник“.
Информацијата за „360 степени“ ја потврди и адвокатот Еленко Миланов, кој присуствува на рочиштата, а претходно му беше и бранител на ексминистерот.
По откажувањето на прогонот, неофицијално дознаваме дека Јанакиески може да биде предложен за сведок во понатамошната постапка.
Судскиот процес „Титаник“, кој се однесува на кривични дела против изборите и гласањето за парламентарните избори во 2011 и 2014 и локалните избори 2013 година, пред неполн месец започна од почеток поради промена на поротник во судечкиот совет. На новиот старт на процесот, Јанакиески и уште седум обвинети признаа вина. Ексминистерот тогаш призна вина за повеќето дела, меѓу кои беа злосторничко здружување, повреда на слободата на определување на избирачите и уништување на изборен материјал.
Тој не призна вина само за злоупотреба на средствата за финансирање на изборна кампања, дело за кое сега обвинителството се откажа од прогон.
По признавањето вина за останатите дела, Јанакиески и седуммината други добија и пресуда од првостепениот суд. Тој беше осуден на затворска казна од 4 години и шест месеци.
Меѓу останатите обвинети кои признаа вина беа и ексминистерката Гордана Јанкулоска која доби затворска казна од 2 години и 6 месеци, поранешната заменик-министерка за правда Гордана Бришковска-Бошковски и Мартин Протуѓер кои добија условни казни. Од останатите четворица кои признаа вина, тројца исто така добија условни казни, додека еден обвинет доби казна затвор од 3 години.
„Титаник“ првично опфаќаше 21 лице. Сега како обвинети кои не признаа вина и за кои ќе продолжи судскиот процес остануваат експремиерот Никола Греувски кој е првообвинет и му се суди во отсуство, како и поранешниот генерален секретар на Владата, Кирил Божиновски, експратеникот Илија Димовски, бившиот градоначалник на Пустец, Едмонд Темелко и уште девет други лица.