Како што соопшти ОЈО, осуденото лице избегало од КПУ „Идризово“, каде што требало да издржува казна затвор заклучно со јануари 2027 година. Потоа тој дошол до обложувачница во населбата Маџари, влегол во објектот и од зад грб му пришол на вработениот. Му се заканил со пиштол и го принудил да ги извади парите од сефот и да ги стави во црна најлонска вреќа
Основното јавно обвинителство Скопје донесе наредба за спроведување истражна постапка против 48-годишникот од Куманово кој откако вчера побегна од затворот „Идризово“, со употреба со огнено оружје, изврши разбојништво во обложувачница.
Како што соопшти ОЈО, осуденото лице избегало од КПУ „Идризово“, каде што требало да издржува казна затвор заклучно со јануари 2027 година. Потоа тој дошол до обложувачница во населбата Маџари, влегол во објектот и од зад грб му пришол на вработениот. Му се заканил со пиштол и го принудил да ги извади парите од сефот и да ги стави во црна најлонска вреќа. Самиот осомничен продолжил да пребарува по фиоките каде што пронашол уште пари и ги ставил во вреќата.
„На овој начин осомничениот сторил кривично дело разбојништво според член 237 став 4 во врска став 1 од Кривичниот законик и се стекнал со противправна имотна корист од 593 525 денари. На излегување го одзел клучот од влезната врата на просторијата за наплата и откако излегол од просторијата го заклучил вработениот внатре. При бегањето, осомничениот го забележале полициски службеници кои го лишиле од слобода во близина на местото на настанот“,
соопшти Обвинителството.
Иако се работи за осудено лице на издржување затворска казна, постојат околности кои укажуваат на опасност од бегство, а и особени околности укажуваат на тоа дека осомничениот ќе ја попречува кривичната постапка со влијание врз сведоците, соучесници, прикривачи и го оправдуваат стравот дека тој ќе го повтори или ќе стори ново кривично дело. Од тие причини јавниот обвинител до судијата на претходна постапка достави предлог за определување мерка притвор, додаваат од ОЈО.