Коларевиќ изјави дека, според собраните докази досега, нема индикации дека истрагата би можела да се прошири и на други лица, но уште еднаш нагласи дека таа сега е започната и не може уште сега да каже што се би произлегло од неа како доказ
Кога обвинителството поднесува предлог за некоја мерка, очекува судот да ја прифати, изјави вечерва обвинителката Катерина Коларевиќ откако пред судија на претходна постапка во Основниот кривичен суд во Скопје ги изнесе аргументите зошто смета дека генералниот секретар на Владата, Мухамед Зеќири, треба да заврши во притвор.
Обвинителството за гонење организиран криминал и корупција го сомничи Зеќири за склучување на договор во четири очи со фирма за консултантски услуги за 57 932 100 денари (941 985 евра), а покрај него осомничени се и двајца Хрвати за кои се сомнева дека му помогнале.
Во изјава за медиумите, по соочувањето со Зеќири и неговиот адвокат пред судија на претходна постапка, таа вели дека имаат сомнежи дека генералниот секретар може да избега, но како што рече тоа се оперативни сознанија.
„Ако судот ги прифати, ќе бидат соопштени, ако не ги прифати, повторно ќе објасни зошто не ги прифати“,
рече Коларевиќ.
Како што рече и шефицата на Обвинителството за гонење организиран криминал и корупција, Вилма Русковска, и Коларевиќ посочи дека за двајцата осомничени Хрвати оперативните сознанија од МВР се дека ја имаат напуштено државата. Но, како што вели, откако МВР ќе достави и официјален податок дека тие излегле од земјава, ќе може со сигурност да се каже дека не се тука.
Притворот, како што претходно рекоа од Обвинителството, се бара поради опасност од бегство, како и опасност од уништување на трагите или влијание на потенцијални сведоци.
На прашањето дали има информации каде се парите, Коларевиќ рече дека во овој момент тоа не може да го кажат и нагласи дека истрагата е започната вчера врз основа на документација собрана во предистражната постапка изминатите неколку месеци.
На прашањето дали парите се изнесени надвор од државата, обвинителката посочи дека трагата ја утврдува финансиското разузнавање.
„Си има Управа за финансиско разузнавање која се обидува да ја утврди трагата како се движеле парите. Кога ќе имаме некој конкретен доказ, ќе ве информираме“,
изјави обвинителката.
На прашање дали се користени ПИ мерки, таа одговори: „Воопшто не“.
Коларевиќ изјави и дека, според собраните докази досега, нема индикации дека истрагата би можела да се прошири и на други лица, но уште еднаш нагласи дека таа сега е започната и не може уште сега да каже што се би произлегло од неа како доказ.
Истрагата била отворена вчера, кога Обвинителството доставило и предлог за притвор за тројцата осомничени. Во меѓувреме, до Зеќири беше упатена покана да се појави во судот, а денеска попладне Кривичниот суд објави и дека издале наредба за негово спроведување. По ова, тој самиот со адвокат се појави пред судија на претходна постапка.
Во врска со истрагата, Обвинителството претходно соопшти дека го сомничи генералниот секретар оти во периодот од април 2021 до јануари 2022 г., без да спроведе јавна набавка, склучил договори за консултантски услуги со фирма кој бил во вкупна вредност од околу 941 985 евра што е за околу 147 000 евра повеќе од 795 000 евра, износ што бил договорен за консултантските услуги.
Откако обвинителството објави дека е отворена истрага, Зеќири набргу се огласи и поднесе неотповиклива оставка од функцијата генерален секретар. Како што наведе тој во објавата, уверен е дека во текот на постапката ќе ја докаже својата невиност.