Со претходни ветувања од страна на политичките партии, обвинетиот, изреволтиран од нивниот однос, нема направено ништо друго освен што ја има израмнето земјата, рече адвокатот на еден од обвинетите
Во Основниот кривичен суд Скопје денеска требаше да започне судскиот процес против двајцата обвинети кои се гонат дека вечерта на 12 мај со багер ја урнаа оградата од поликлиниката „Бит Пазар“ за да си направат паркинг и да наплаќаат, меѓутоа судењето се одложи.
Во судница се појавија двајцата со нивните адвокати, како и обвинителката Елена Иваноска-Миноска, но со оглед дека еден од обвинетите не го примил обвинението, судијката Славица Наумова-Јосифовска го одложи рочиштето и закажа ново за следниот понеделник (5 јуни).
Двајцата обвинети се гонат за узурпација на недвижности според став од кривичниот закон кој предвидува дека имало намера земјиштето да се употреби за градба или користење, при што ОЈО Скопје тврди дека сакале да стават рампа и да наплаќаат за паркинг.
Адвокатот Драган Пешевски, кој е бранител на еден од обвинетите, пак, тврди дека ваквата квалификација е неточна. Можеби имало узурпација, вели, но никако со намера да се гради или трајно да се оштетат својствата на земјата. Апсолутно е неточно, тврди адвокатот, дека обвинетиот што го ангажирал багерот сакал да направи паркинг. Според неговата изјава, рушењето на оградата и порамнувањето на земјиштето било направено од револт поради ветувања што обвинетиот ги добивал од политички партии.
„Можеби знаете за која земја се работи, тоа е паркингот зад поликлиниката ’Бит Пазар‘ кој долги години и служеше како див паркинг, место каде се собираа наркомани и слични лоши појави. Затоа, со претходни ветувања од страна на политичките партии, обвинетиот изреволтиран од нивниот однос нема направено ништо друго освен што ја има израмнето земјата, ништо повеќе – никаква градба, наплата, рампи… Ништо нема“,
вели Пешевски.
Адвокатот рече и дека обвинетиот е согласен да ја надомести штетата и до наредното рочиште ќе стапат во контакт со надлежните институции за да се врати просторот во првобитната состојба.
За овој случај, ОЈО Скопје поведе постапка веднаш по узурпацијата на земјиштето и побара притвор за осомничените.
„Во ноќни услови, на особено фреквентно место од градот, со своите ископувања стигнале до самите ѕидови на болницата, при што го загрозиле пристапот до болницата и спроводот на пациентите во итни случаи. Намерата на осомничените била во најкраток можен период за време на викендот да го заокружат криминалниот потфат со ставање сопствена рампа со која во иднина би го узурпирале просторот и би профитирале од наплата на паркинг без дозвола. Ова за Обвинителството укажува дека тенденцијата на осомничените била и понатаму да се занимаваат со казниви дејствија што го оправдува стравот дека постои опасност тие да го повторат кривичното дело“,
соопштија од ОЈО Скопје на 14 мај кога поведоа постапка.
На првоосомничениот тогаш му беше определен притвор од 8 дена, додека на второосомничениот – управувачот со багерот, судот му изрече мерка претпазливост.