Од Министерството за култура соопштија дека било договорено за време на траењето на огласот, што е 15 дена, в.д. директор на установата да биде актерката, од редот на вработените, Магдалена Ризова-Черних, а уметнички раководител да биде драматургот Дарко Јан Спасов
Министерката за култура Ирена Стефоска денеска ги информира вработените во НУ „Театар комедија“ дека согласно Законот за култура денеска е објавен јавниот оглас за нов директор на таа институција со полн мандат од четири години.
Од Министерството за култура соопштија дека било договорено за време на траењето на огласот, што е 15 дена, в.д. директор на установата да биде актерката од редот на вработените Магдалена Ризова-Черних, а уметнички раководител да биде драматургот Дарко Јан Спасов.
„Министерката Стефоска и вработените во НУ ‘Театар комедија’ се договорија во следниот период да го одржат професионалното ниво на соработка и високото реноме на институцијата. Министерката Стефоска и вработените во НУ ‘Театар комедија’ изразуваат искрена желба на јавниот оглас да се пријават сите заинтересирани кои ги исполнуваат условите и најквалитетниот кандидат да биде избран за директор со редовен мандат. На тој начин, еден од омилените театри во земјава ќе продолжи со успешниот репертоар, за кој низ годините се бара карта повеќе“,
се вели во соопштението.
Во средата министерката Стефоска ја разреши Нора Шаќири-Марковиќ од позицијата в.д. директор на Театарот, со образложение дека спровела дисциплинска постапка во време на изборен процес. Шаќири-Марковиќ, пак, рече дека решението е неосновано, бидејќи за случајот требало да се изјасни Антикорупциска комисија бидејќи инспекторите од Трудовиот инспекторат не донеле заклучок.
Во исто време, колективот излезе во јавноста со видеопорака во која ѝ изрази поддршка на Шаќири-Марковиќ, а на министерката ѝ порачаа дека доколку смета дека не треба таа да ја извршува функцијата да распише оглас, а во меѓувреме в.д. директор да биде драматургот Дарко Спасов, а не Магдалена Ризова-Черних, за која велат дека е од претходната управа која беше разрешена поради злоупотреба на буџетски средства.