Како аргумент се наведува дека можно е влошување на епидемиолошката состојба на есен, како и ограничениот пристап до интернет
НСДП предлага Комисијата за заразни болести и владата да ја разгледаат и можноста оваа учебна година во целост да не започне, односно учениците да останат дома цела година.
Во партиското соопштение, како аргументи во прилог на овој нивен предлог се наведува тоа што физичкото присуство на учениците во училиштата, макар тоа да биде и во ограничена форма преку одење на училиште на одредени одделенија, комбинирано со спроведување онлајн настава, може да го зголеми бројот на заразаени со коронавирус. Тука го посочуваат примерот со Израел каде, како што велат, по отворањето на училиштата се појавил нов и пожесток бран на зараза, достигнувајќи и над 2 000 новозаразени на ден кон крајот на јули.
„Најавите за можноста од повторно воведување рестриктивни мерки во есенските и зимски месеци, во ситуација на реални очекувања за влошување на епидимиолошката ситуација, ќе значи внесување дополнителни прекини и нарушувања на образовниот процес, вo која било форма да се одлучи тој да се спроведе“,
посочуваат од НСДП.
Од друга страна, за оваа партија имплементирањето на онлајн наставата носи сериозен ризик за нарушување на инклузивноста на целокупниот образовен процес, поради тоа што дел од децата немаат пристап до интернет или интернет-конекцијата е неквалитетна.
„Спроведувањето онлајн настава во услови на недоволно развиена комуникациско-технолошка мрежа ќе значи влегување во ризик да се ускрати и правото на образование“,
сметаат од НСДП.
Но, неодењето на учениците на училиште, како што се наведува во соопшението, не мора да значи и изгубена година за образованието во земјава и комуникацијата помеѓу наставниците и учениците може да продолжи преку воспоставување нови и креативни форми на комуникација. За владата пак, тоа може да биде година која ќе се искористи за градење на долгорочна стратегија за развој на образованието во земјава.
„Бранот на истражувања на вакцини во светски реномирани медицински центри и фармацевски компании влева оптимизам дека наредната година ќе се овозможи пристап до квалитетна вакцина која ќе понуди заштита на населението од заразата и ќе се создадат епидемиолошки услови за спроведување нормален и редовен орбазовен процес“,
објаснуваат од НСДП.
Министерот за образование Арбер Адеми вчера во изјава за повеќе медиуми рече дека Министерството за образование и наука во моментов ги собира податоците колку моделот комбинирана настава со онлајн може да функционира.
Ваквите модели треба дополнително да се разгледаат и да се види што е најдобро за да се искристализираат некои прашања и дилеми.
Комисијата за заразни болести неделава на средбата со претставниците на Министерството за образование предложи учениците од прво до трето одделение да ја започнат новата учебна година со физичко присуство, а останатите ученици во основното и средно образование да ја следат наставата онлајн. Министерот з здравство Венко Филипче во повеќе наврати досега изјави дека најдобро е наставата да биде со физичко присутво, но во овие услови тој е за онлајн настава, пред се поради безбедноста на учениците и вработените.
Претседателот на СОНК, Јаким Неделков, осврнувајќи се на предложените три модели за настава од септември за РСЕ денеска изјави дека условите во училиштата на национално ниво не се исти, па затоа не смее да се унифицира еден модел којшто ќе важи за сите.
Негово мислење е дека е неизбежен модел на онлајн настава или можеби комбинирана настава, каде дел од училишта ќе работат онлајн, дел со физичко присуство на ученици и вработени, односно наставници.