Веќе в понеделник, 31 август, Заев би можел да се вратил на „Илинденска“, од каде што замина пред осум месеци, на 3 јануари годинава, кога беше избрана техничката влада
Само дваесетина дена траеше мандатот на седуммина пратеници од водечките двојки на СДСМ на 10. парламентарни избори, како и на двајца новоизбрани пратеници на ДУИ.
Собранието, по два часот по полноќ, стигна да ги констатира оставките што ги поднесоа пратениците, во функција на формирање на новата влада на СДСМ и на ДУИ, како и да ги верификува мандатите на нивните наследници.
Од парламентот заминаа Никола Димитров и Мила Царовска кои беа на првите две места на листата на „Можеме“ во првата изборна единица, а кои остануваат и во новиот кабинет на Зоран Заев, но ротираат на други министерски позиции. Димитров го напушта Министерството за надворешни работи за да биде вицепремиер за европски прашања, на местото на Бујар Османи, а Царовска, која беше вицепремиерка за економски прашања во техничката Влада, а претходно министерка за труд и социјална политика сега преминува во Министерството за образование, со кое досега раководеше Арбер Адеми.
Техничкиот премиер Оливер Спасовски, кој беше носител на листата во втората изборна единица, се враќа на чело на Министерството за внатрешни работи.
Двајца нови пратеници има и од третата ИЕ. Носителот на листата Љупчо Николовски, се враќа во Владата, но сега како вицепремиер за спречување корупција, одржлив развој и човечки ресурси. Во претходната влада на Заев, Николовски две години беше министер за земјоделство, пред да се повлече од функцијата за да биде генерален секретар на СДСМ.
Второрангираната во третата ИЕ, Јагода Шахпаска, која повеќе години беше пратеничка, преминува исто така во извршната власт, како министерка за труд и социјална политика.
Мандатарот Зоран Заев вчера прв се повлече од пратеничкото место, што го освои како носител на листата на СДСМ во четвртата ИЕ. Се очекува денеска Заев да го достави до парламентот списокот на кандидати за министри во неговата нова влада, која, според најавите, би била избрана в недела на полноќ. Веќе в понеделник, 31 август, Заев би можел да се вратил на „Илинденска“, од каде што замина пред осум месеци, на 3 јануари годинава, кога беше избрана техничката влада.
Радмила Шекеринска, која и на овие избори беше носителка на листа во петтата ИЕ, останува министерка за одбрана, но не се знае се уште дали ќе го задржи и вицепремиерското место или овој кабинет на Заев ќе остане со четворица потпретседатели.
Собранието ја констатира синоќа и пратеничката оставка на досегашниот и иден министер за животна средина Насер Нуредини, кој беше четврторангиран на листата на ДУИ во шестата ИЕ. Претходно, оставка поднесе Флорин Бесими, кој беше втор кандидат на ДУИ во „шестката“, веднаш зад Али Ахмети. Но тој не поднесе оставка за да биде министер, туку за да избегне судир на интереси при изборот на Владата, каде што се враќа неговиот брат Фатмир Бесими, кој досега има министерско искуство во неколку ресори, а сега ќе го предводи Министерството за финансии, место Нина Ангеловска.
Сите оставки и верификации на мандати вчера беа констатирани и гласани на посебни седници, на кои постојано беа присутни по 61 од вкупно 62 пратеници кои се дел од новото парламентарно мнозинство. Од седниците отсуствуваа сите пратеници од опозициските редови. Новите пратеници се појавуваа во салата веднаш по верификацијата на мандатите, а досегашните заминуваа еден по еден, како што им беа констатирани оставките и на тој начин се овозможуваше кворум.
Во целодневно заседание беше и Државната изборна комисија, која на секој час испраќаше во парламентот нов извештај за секој нов пратеник од кандидатските листи на СДСМ и на ДУИ.