Согласно оваа одлука, и во наредните 25 дена ќе биде забранет извоз на: пченица и наполица, јачмен, пченка, брашно од пченица и наполица, семе од сончоглед…, со цел заштита на домашниот пазар во време на криза
Забраната за извоз на одделни житарки и сончогледово масло е продолжена до 15 април 2022 година. Одлуката е донесена на денешната владина седница, на предлог на Министерството за економија, а во координација со Министерството за земјоделство, шумарство и водостопанство.
Согласно оваа одлука, и во наредните 25 дена, до 15 април, ќе биде забранет извоз на: пченица и наполица, јачмен, пченка, брашно од пченица и наполица, семе од сончоглед-вклучувајки кршено или дробено, масла од семе од сончоглед, шафраника или мапуково семе и нивни фракции, пречистени или непречистени, но хемиски немодификувани, од сончоглед, соопштија од Министерството за економија.
Оттаму велат дека, кога на домашниот пазар се очекува да настанат сериозни пореметувања поради недостаток на стоки, неопходно потребни за производството, преработката и за животот и здравјето на граѓаните, Министерството за економија може да и предложи на Владата да се ограничи извозот или увозот на одделни стоки или пропишување на посебните услови за увоз или извоз на одделни стоки. Целта на оваа мерка, како што се наведува, е заштита на домашниот пазар и граѓаните во време на криза, за да се избегнат шпекулативни дејствија на трговците и производителите и за заштита на домашното производство, домашниот пазар и граѓаните.
Владата, пред околу една седмица, донесе Одлука за ограничување на извозот на одделни стоки. Оваа забрана беше предвидено да трае до 20 март, со цел да не се овозмож нивен извоз, со забрзана динамика на штета на домашниот пазар.