Според истражувањето на Универзитетската болница во Осло, силниот имунолошки одговор по примањето на вакцината од „Астра Зенека“ е причина за згрутчување на крвта кај тројца здравствени работници, од кои едниот починал
Ставот на Европската агенција за лекови (ЕМА) дека вакцината на „Астра Зенека“ е безбедна и ефикасна и дека нема потреба да се запре имунизацијата со оваа вакцина, бидејќи нема конкретни докази дека таа предизвикува згрутчување на крвта кај пациентите, е причината Германија, Франција, Италија и Шпанија да објават дека ја продолжуваат имунизацијата со оксфордската вакцина по привремениот прекин во очекување на експертскиот став од ЕМА.
Нивниот пример најавија дека ќе го следат и Португалија, Холандија, Летонија, Литванија, Кипар и Бугарија, кои исто така имаа сомневање во безбедноста на оваа вакцина по случаите на згрутчување на крвта (кои некаде завршија и фатално).
Но, за разлика од нив, Норвешка, која всушност и го покрена прашањето за безбедноста на вакцината на „Астра Зенека“ против ковид, преку Институтот за јавно здравје објави дека и натаму нема да ја користи оваа вакцина.
Директорот Аудун Хаги на прес-конференција рече дека тие не можат да ја исклучат врската помеѓу згрутчувањето на крвта кај пациентите и вакцината на „Астра Зенека“ и ги посочи досегашните случаи кај нив – шест лица имале тешки компликации по вакцинацијата, а две лица починале.
Според истражувањето на Универзитетската болница во Осло, силниот имунолошки одговор по примањето на вакцината од „Астра Зенека“ е причина за згрутчување на крвта кај тројца здравствени работници, од кои едниот починал.
„Докажавме дека специфични антитела ја предизвикуваат оваа состојба со тромбоцитите, за што активатор е администрираниот лек. Нема ништо друго освен вакцина што може да предизвика ваква реакција на имунолошкиот систем“,
вели главниот лекар во болницата, професорот Пол Андре Холме.
Норвешките научници тврдат дека имаат докази за поврзаноста на вакцината и ваквите случаи, но сепак тие признаат дека одговорот на прашањето, зошто токму кај овие тројца се појавил тромб, а кај другите не, останува во доменот на теориите.
Досега се пријавени 15 случаи со длабока венска тромбоза и 22 случаи со белодробна емболија во ЕУ и Велика Британија кај оние што ја примиле вакцината до 8 март. Ова, според компанијата, е многу пониско од очекуваното и е слично со другите лиценцирани вакцини против ковид-19.
На својата веб-страница компанијата објави дека внимателната анализа на сите достапни безбедносни податоци, од повеќе од 17 милиони луѓе вакцинирани во Европската Унија и Велика Британија, во врска со вакцините на „Астра Зенека“, не укажала на докази за зголемен ризик од белодробна емболија, длабока венска тромбоза или тромбоцитопенија, во која било дефинирана возрасна група, пол, серија или во која било посебна земја.
Месечниот извештај за безбедноста ќе биде објавен на веб-страницата на Европската агенција за лекови следната недела.
Згрутчувањето на крвта е поврзано со висока смртност од ковид
Во дебатата за тоа дали има поврзаност на овие состојби и вакцината на „Астра Зенека“ се вклучи и Универзитетот Хадерсфилд во Велика Британија, преку писмо испратено од д-р Хамис Мерчант од овој универзитет, кое е објавено во Британскиот медицински журнал.
Тој смета дека имунолошка тромбоцитопенија (ИТП) може да биде предизвикана од вируси, лекови и вакцини. Конкретно кај пациенти со ковид-19, се посочува дека коагулопатијата е главен фактор што придонесува за високата смртност поврзана со оваа болест.
Тој наведува дека се пријавени повеќе од 150 пријави за тромбоцитопенија по вакцинирањето против ковид-19 во базите на податоци во ВАЕРС и МХРА и дека е потврден најмалку еден смртен случај во САД, кој сè уште е под истрага.
Од друга страна, пак, тој посочува на податоците за случаи со ваква состојба без некоја причина – според Националната организација за ретки нарушувања, преваленцата на тромбоцитопенија кај возрасни е 9,5 случаи на 100 000 луѓе годишно, а кај деца 5,3 на 100 000 лица.
Врз основа на ова, тој вели дека постои веројатност оти генетските вакцини против ковид-19 може да играат улога во стимулирање на автоимун одговор на тромбоцитите, што може клинички да се манифестира како тромбоцитопенија, крвавење и згрутчување на крвта, но, сепак, посочува дека за да се потврди оваа хипотеза потребни се значителни докази.
Посебно кога се работи за генетските вакцини, кои се нови, а нивната долгорочна проценка на безбедноста е клучна за идентификување на потенцијално контраиндицирана група субјекти, како што се пациенти со историја на нарушувања на крвта, минато или сегашна тромбоцитопенија или веќе постоечки имунолошки состојби.