Во услови на врзан курс со еврото, ние ги имаме сите инструменти на располагање. Ние ќе останеме во зоната на умерена инфлација, оценува поранешниот министер за финансии
Ќе останеме во зоната на умерена инфлација и нема сценарио во кое може да има удар врз курсот на денарот, смета универзитетскиот професор Никола Поповски, кој е поранешен министер за финансии и член на Советот на Народната банка.
Тој во вчерашното гостување на ТВ 24 посочи дека инфлаторните притисоци се застапени секаде во еврозоната, во Германија како нејзина најголема економија и во САД, каде што инфлацијата е околу седум проценти. Нагласи дека нашата економија е само мал остров во океанот и дека поскапувањата се резултат на она што се случува глобално.
Според Поповски, нема сценарио во кое може да се зборува за девалвација на денарот.
„Нашата инфлација веројатно до крајот на годината ќе се намали. Ударот беше јануарски, поради еднократното зголемување на цените на електричната енергија и парното. Девизните резерви се на високо ниво, на тоа упатува и извештајот на ММФ, каде што се тоа се квантифицира. Во услови на врзан курс со еврото, ние ги имаме сите инструменти кај нас на располагање па дури и кога има инфлација. Оваа е умерена инфлација. И во теоријата кога е едноцифрена инфлацијата, таа е умерена. Ние ќе останеме во зоната на умерена инфлација“,
оцени Поповски.
Како предизвици што доаѓаат за ценовните движења, Поповски ги посочи и развојот на руско-украинскиот конфликт, како и одмрзнувањето на цените на храната, која беше привремена мерка.