Опозициската партија го „прогласи“ бугарскиот вицепремиер за пријател на Заев по објавата на имињата на дваесетина гласачи во Бугарија кои се исти како и имињата на функционери на ВМРО-ДПМНЕ
ВМРО-ДПМНЕ нека си се разбере со Каракачанов и да не нѐ меша во нивните меѓусебни препукувања со ВМРО-БНД. Вака реагираат од СДСМ откако опозициската партија, демантирајќи ги наводите на бугарскиот вицепремиер за можни вмровски функционери запишани во Избирачкиот список во Бугарија, обвини за „пакт“ меѓу премиерот Зоран Заев и Красимир Каракачанов.
„Должничко-доверителските односи со Каракачанов нека си ги расчистуваат самите, без да се обидуваат да нѐ инволвираат нас. Како и досега, СДСМ нема со каква било постапка да дава повод македонското прашање дополнително да биде злоупотребувано во кампањата во соседна Бугарија“,
реагираат од СДСМ.
Меѓу дваесетината посочени имиња е и Антонијо Милошоски, пратеникот на ВМРО-ДПМНЕ и поранешен шеф на дипломатијата. Тој на Фејсбук напиша кратка објава посочувајќи: „Краток коментар за објавата од пријателот на Заев – фантом фирма, фантом ваксајнс, фантом пасоши“.
Александар Пандов, чие име исто така се спомнува во списокот на бугарскиот вицепремиер, пак, во статус на Фејсбук возвраќа со мошне погрдни зборови кон Каракачанов.
„Сите ли вака ко тебе лажат таму во Бугарија или ова ти е нарачка од твоите коалициони партнери Заев и Шеќеринска тука од Македонија“,
пишува, меѓу другото, директорот на Патриотскиот институт на ВМРО-ДПМНЕ.
Дека има бугарски пасош демантира и Петар Богојески, кој своевремено беше разрешен од раководството на ВМРО-ДПМНЕ и е еден од критичарите на сегашното партиски раководство.