„Ја слушнавме Бугарија и ги охрабруваме двете страни итно да изнајдат заеднички прифатливо решение. Условите се исполнети, земјите членки се одлучија да ги отворат преговорите за С Македонија и се надеваме дека меѓувладината конференција ќе се свика што е можно побрзо, по усвојувањето на преговарачката рамка“, вели шефот на дипломатијата на ЕУ
Шефот на дипломатијата на ЕУ, Џозеп Борел, изјави попладнево дека со министрите за надворешни работи се согласиле дека не постои намера за одвојување на Албанија и Северна Македонија во интеграцискиот процесот, како што пренесува МИА од Брисел.
Западен Балкан за првпат по две години денеска се најде на агендата на министрите за надворешни работи, соопшти Борел и додаде дека нема да дозволи да поминат повторно две години без да се дебатира за регионот – клучен за Европската Унија.
Во воведниот говор, тој се осврна на Северна Македонија, откако се појавија бројни шпекулации дека Скопје и Тирана би можеле да бидат одвоени доколку не се отстрани ветото на Бугарија.
„Имаше согласност во Советот денес дека е потребно забрзување на процесот на реформи поврзани за ЕУ во регионот. Сакаме, исто така, да се забрза процесот на приклучување кон ЕУ и немаме намера да ги одвојуваме Северна Македонија и Албанија“,
изјави шефот на европската дипломатија по состанокот со 27 министри за надворешни работи на ЕУ.
Борел нагласи, исто така, дека Европската Унија е загрижена поради изјавите за одвојување на Скопје и Тирана и дека ставот во Советот не е променет по ова прашање.
На прашање на МИА околу блокадата за Северна Македонија наспроти плановите на ЕУ да биде попристуна во Западен Балкан, Борел одговори дека двете страни треба итно да изнајдат заеднички прифатливо решение.
„Имавме разговор за ова денес. Ја слушнавме Бугарија и ги охрабруваме двете страни итно да изнајдат заеднички прифатливо решение. Условите се исполнети, земјите членки се одлучија да ги отворат преговорите за Северна Македонија и се надеваме дека меѓувладината конференција ќе се свика што е можно побрзо, по усвојувањето на преговарачката рамка. Министрите за надворешни работи на земјите членки се заложија да туркаат силно за свикување на првата меѓувладина конференција и да ја усвојат рамката,“
изјави Борел попладнево на прес – конференцијата по Советот за надворешни работи на ЕУ.