Поддршката за земјите од Западен Балкан во борбата против пандемијата и процесот на проширување е една од темите на денешниот состанок на Советот на ЕУ во Брисел
ЕУ мора веднаш да започне преговори со Северна Македонија за влез во ЕУ, изјави шведската министерка за надворешни работи Ан Линде по пристигнувањето на денешниот состанок на Советот на ЕУ во Брисел.
„Со нетрпение ги очекувам дискусиите за Западен Балкан денеска. ЕУ има големи обврски кон Западен Балкан и ние мора да ги одржиме своите ветувања. Мора веднаш да започнеме преговори со Северна Македонија и важно е да се одржи довербата во ЕУ“,
изјави Линде и додаде дека истовремено треба да продолжи реформскиот процес во Западен Балкан.
Освен Линде, поддршка за почеток на процесот на преговори за нашата земја и за Албанија искажаа и словачкиот министер за надворешни работи Иван Корчок, кој рече дека ЕУ мора да продолжи со процесот на проширување и да не ги разочара граѓаните на овој регион кои својата перспектива ја гледаат во ЕУ.
Таков е и ставот на Финска, која на денешниот состанок ќе ја претставува државната секретарка во МНР Нана Сумувори. Таа на пристигнувањето изјави дека мора да се задржи перспективата на Западен Балкана и да продолжи процесот со С Македонија и Албанија.
Ева-Марија Лиметс, министерка за надворешни работи на Естонија, смета дека во пресрет на јунскиот самит ЕУ мора да договори конкретни чекори и изрази надеж дека политиката на проширување на ЕУ ќе продолжи со конференција за С Македонија и Албанија.
Хрватскиот министер за надворешни работи Гордан Радман, изјави дека на ЕУ ѝ е потребен дополнителен политички ангажман и стратегиски пристап кон Западен Балкан и дека партнерите во регионот мора да покажат резултати во областите на демократската трансформација, човековите права и владеењето на правото.
„Тоа значи почеток на преговорите со Северна Македонија и Албанија и визна либерализација за Косово. Црна Гора мора да остане посветена на патот кон ЕУ, а Србија мора да се фокусира на реформите и надминувањето на наследството од војната“,
изјави хрватскиот министер за надворешни работи.
Претходно, високиот претставник на ЕУ и потпретседател на Европската комисија Џозеп Борел рече дека Унијата сака да му понуди на регионот подобра европска перспектива.
Борел најави дека состојбата на Западен Балкан е една од најважните теми за кои ќе разговараат министрите за надворешни работи на ЕУ денеска.
„Ние сакаме да имаме нов увид во ситуацијата на Западен Балкан и да видиме како можеме повеќе да се вклучиме во регионот“,
рече Борел.
Тој ја истакна важноста на Западен Балкан за ЕУ и додаде дека на состанокот ќе се разговара за начините „да му се понуди на регионот подобра и посилна европска перспектива“.
Како што беше претходно најавено, Борел ќе им претстави „нон-пејпер“ на министрите на состанокот, на кој е посочено дека јасна цел на Западен Балкан е полноправно членство во ЕУ, и секој предлог за друг пат е одвлекување на вниманието со лоши последици врз силната работа што мора да се направи за да се постигне визијата за обединета, силна и просперитетна Европа.