Српскиот претседател ноќта и утрово имал состанок со министерот за одбрана и со началникот на Генералштабот на Армијата на Србија во врска со ситуацијата на северот на Косово
Потпретседателот на Српската листа, Игор Симиќ, утрово за РТС изјави дека ситуацијата на Косово и Метохија е мирна, но тензична. Тој вели дека Србите се залагаат за мир и ќе направат сè за да го зачуваат
Претседателот на Србија, Александар Вучиќ, утрово соопшти дека се сретнал со министерот за одбрана на Србија, Милош Вучевиќ и со началникот на Генералштабот на Армијата, Милан Мојсиловиќ.
„Во текот на ноќта и утрото со министерот за одбрана Милош Вучевиќ и началникот на Генералштабот на вооружените сили Милан Мојсиловиќ… нема предавање!“,
напиша Вучиќ на Инстаграм.
Претходно, на северот на Косово при вооружен напад полесно беше повреден припадник на полицијата. Полицијата соопшти дека нападот се случил синоќа околу 23 часот во селото Србовац во Општина Звечан.
Потпретседателот на Српската листа, Игор Симиќ, утрово за РТС изјави дека ситуацијата на Косово и Метохија е мирна, но тензична.
Тој вели дека Србите се залагаат за мир и ќе направат сè за да го зачуваат.
„Но, верувајте, сè се сведува на ова, луѓето не можат да живеат на овој начин во 21 век на почвата на Европа додека Приштина ги гази основните човекови права, сите потпишани договори, го малтретира српскиот народ, а меѓународната заедница молчи“,
рече Симиќ за РТС.
На прашањето каде се специјалците во моментов, Симиќ вели дека на периферијата на градот во мешани мултиетнички населби сè уште има некои единици кои, како што рече, дошле илегално од југ илегално, без никаква причина, северно од Косовска Митровица.
„Она што сакам особено да го нагласам е дека изговорот што го користеа, дека треба да дојдат, апсолутно не е издржан. Овде немаше дестабилизација на околностите – и Србите и Бошњаците, Албанците и Гораните имаа нормален ден овде“,
вели Симиќ.
Косовската полиција го зголеми присуството на северот на Косово, каде што во последните денови има чести инциденти.
Повеќе од 200 вооружени специјалци на косовската полиција, придружувани од оклопни возила, вечерва влегоа од јужниот во северниот дел на Митровица, соопштија вчера српските медиуми.
Владата на Косово ги демантираше пишувањата во српските медиуми дека специјални полициски единици биле испратени на северот на Косово. Во изјава за регионалниот сервис за Радио Слободна Европа (РСЕ), портпаролот на косовската влада рекол оти се работи за обична, а не за специјална полиција.
Завчера во Северна Митровица, општина со мнозинско српско население на северот на Косово, биле фрлени две експлозивни направи. Во овој инцидент нема повредени лица, а како што информирал директорот на полицијата за овој регион, Бесим Хоти станува збор за шок бомби.
Експлозиите се случуваат еден ден откако косовската полиција објави дека маскирани групи и поединци употребиле „опасни средства, вклучително и рачни гранати од југословенско производство“ во нападот на канцелариите на општинските изборни комисии во Северна Митровица и Зубин Поток.
Во четири општини на северот на Косово – Северна Митровица, Лепосавиќ, Звечан и Зубин Поток – живее мнозинско српско население.
Во овие општини за 18 декември се закажани вонредни локални избори на кои се противи Српска листа, најголемата српска партија на Косово, која има поддршка од официјален Белград.
Претставниците на Српската листа, кои водеа четири општини на север, поднесоа оставки на почетокот на ноември, незадоволни од одлуката на Владата на Косово да ги пререгистрира возилата од српски во таблички со ознака РКС (Република Косово).
Во меѓувреме, страните постигнаа договор. Косово се согласи да го суспендира својот план за пререгистрација на возилата, додека Србија вети дека нема да издава нови регистарски таблички на србите на Косово.
Оставки поднесоа и други српски официјални претставници на северот, и на локално и на централно ниво.
Поради неодамнешните инциденти, Соединетите Американски Држави побараа Косово да го одложи одржувањето на изборите.
Со ставот на САД се согласи и германскиот амбасадор во Косово, Јорн Роде кој на Твитер објави дека моменталната ситуација на северот Косово не е погодна за одржување на избори.
Претседателката на Косово, Вјоса Османи вчера изјави дека одлуката за изборите ќе се донесе во рок од два до три дена.