Од владиниот кабинет единствено велат дека очекуваат брза и темелна истрага независно за кого станува збор, додека од МВР посочуваат дека не можат да откриваат идентитет на осомничени
Нема одговор од Владата дали еден од приведените во акцијата во која се запленети 200 килограми марихуана е возач на Трајче Заев, братучед на премиерот Зоран Заев. И дали комбето во кое е откриена марихуаната е на фирма поврзана со Заеви.
Портпаролот на ВМРО-ДПМНЕ, Димче Арсовски, вечерва го повтори прашањето дали комбето во кое е фатена марихуаната е на фирма поврзана со Трајче и со Бобан Заев.
„Уште ќе молчите или ќе одговорите? Кратко и јасно – да или не? Не боли одговорот, ама значи десетина години затвор“,
напиша Арсовски на својот фејсбук профил.
По наводите на ВМРО-ДПМНЕ, од Владата нема конкретен одговор дали комбето со грчки таблици, во кое е откриена дрогата, е навистина во сопственост на фирма која е партнер во битолската фирма за канабис „Медицал 420“, додека едно од возилата што го следеле комбето било управувано од возач на Трајче Заев.
Од Владата не упатија на МВР за одговори во врска со приведените во вчерашната акција. Од МВР, пак, велат дека не смеат да откриваат идентитет на осомничени лица.
Од Владата единствено велат дека очекуваат брза и темелна истрага независно за кого станува збор.
„Владата очекува брза и темелна истрага од на надлежните инситуции, одговор на прашањата кои се од интерес на јавноста и неселективно постапување без разлика за кого станува збор. Доколку некој постапил незаконски мора да се соочи со одговорност. Во врска со сопственост на возила на приватни субјекти ве упатуваме за тоа да прашате во компаниите кои се предмет на интерес“,
велат од владиниот кабинет.
Министерство за внатрешни работи соопшти денеска дека се поднесени се кривични пријави за „неовластено производство и пуштање во промет наркотични дроги, психотропни супстанции и прекурсори“ против шестемина приведени во вчерашната акција. Според информациите што ги објавија МВР и Обвинителството, кое отвори истрага за овој случај и бара притвор за осомничените, еден од приведените е од Струмица – Д.Ј. (35), кој е посочен и како организатор на криминалната група, додека другите се од Куманово, Битола, Прилеп и двајца од Скопје.
Некои медиуми објавија дека возач на Трајче Заев е Александар Ушлиновски, чии иницијали се совпаѓаат со еден од приведените за кои информираше МВР (А.У. – 45 години од Скопје).
МВР информираше претходно дека, освен против Д.Ј и А.У., кривични пријави се поднесени и против М.З. (29) од Куманово, М.С. (36) од Битола, К.С. (46) од Прилеп, Г.К. (25) од Скопје.
Како што соопшти МВР, на патниот правец Прилеп – Росоман вчера било запрено патничко возило „ауди А8“, со скопски регистарски ознаки, во кое биле пријавените К.С. и М.З.. Веднаш потоа е запрено патничко возило „дачија дастер“, со скопски регистраски ознаки, управувано од А.У, каде како сопатник бил Г.К., а зад нив и товарно возило „комбе“, во кое се наоѓала поголема количина дрога, спакувана во 40 картонски кутии во кои имало 400 полиетиленски пакувања со дрога. Тие биле лишени од слобода, а во Прилеп, како што информираа од МВР, во исто време, е приведен и М.С., кој управувал товарно возило ‘ивеко’, со битолски регистарски ознаки, додека во Гевгелија, на бензинска пумпа, бил лишен и организаторот на криминалната група Д.Ј., кој управувал патничко возило ‘опел астра’, со скопски регистарски ознаки.
Поврзаноста на Заеви со фирмата „Медицал 420“ од Битола, портпаролот на ВМРО-ДПМНЕ денеска ја објасни со тоа што братучедите на премиерот Трајче и Бобан Заеви, на 20 мај 2019 година, основале фирма во Петрич, Бугарија – „Медикал 420 Бг ЛТД“.
„Тука не се работи за случајност. Пратката, неофицијално се говори, е од ‘Медикал 420’ – фирмата за одгледување канабис, каде што, исто така, нашите информации неофицијално говорат дека недостигаат над 200 кг., но тоа подоцна ќе го покаже истрагата. И клучната работа, иста таква фирма во Бугарија поседуваат Трајче Заев и Бобан Заев, кои се први братучеди на Зоран Заев, така што белото комбе во кое е запленета дрогата не може да биде случајност“,
изјави денеска портпаролот Арсовски.
Акцијата е спроведена со поддршка на Американската служба за борба против дрога – ДЕА.