Погрдни зборови за обвинителката Фатиме Фетаи, скандирање УЧК и барања да се разреши Фетаи и да има правда во „Монструм“, каде што според демонстрантите се гонат невини луѓе, беа пораките од денешниот протест за овој случај.
Протестниот марш следува откако во завршните зборови во повторениот судски процес обвинителката Фатиме Фетаи остана на обвинението дека во случајот со петкратното убиство кај Смилковско Езеро станува збор за тероризам.
Протестот почна во Чаир, продолжи по улицата „Цветан Димов“ (Бит-пазар), а потоа групата се упати до плоштадот „Скендер Бег“, од каде што преку Стоковната куќа „Мост“ требаше да се упати до Основното јавно обвинителство. Пристапот до зградата на обвинителството беше блокиран од силното полициско присуство, па крајната дестинација на демонстрантите беше соседната зграда на Министерството за надворешни работи пред мостот на реката Вардар во центарот на Скопје.
Демонстрантите скандираа УЧК и извикуваа погрди зборови за обвинителката Фатиме Фетаи, а качен на автомобил со албански регистарски ознаки им се обрати родина на еден од обвинетите. Ситуацијата на момент ескалираше и можеше да се забележи чад, најверојатно од фрлање димни бомби во правец кон зградите на Обвинителството и МНР. Беше скршено стаклото од влезната врата на Министерството. Набргу реагираа и организаторите, па демонстрантите се повлекоа и протестот заврши.
Роднината на еден од обвинетите, Бедеи Ајдари, кој зборуваше качен на возило, на крајот даваше и изјава за медиумите и рече дека тие не сториле никаков тероризам и наметна теорија дека можеби некој друг, Македонец, наредил да се убијат жртвите со цел да се обвинат Албанци и да се држи подготвен некаков конфликт.
„Ние сме граѓани тука, од Македонија, не сме имале никогаш проблеми со соседите. Ние, нашите семејства не сме едуцирани да убиваме, а најмалку да направиме терористички чин. Ние го осудуваме овој чин, но не сакаме да нѐ најдат како случајна жртва за да понесеме одговорност”,
рече Ајдари.
Она што го бараат, порача, е да се спроведуваат законите.
„Знаеме дека правниот систем од поодамна е корумпиран, се озборува и во Европа и сегде, имаме забелешки од Прибе и од други кои укажуваат дека не ни чини правниот систем. Овие луѓе кои дојдоа не дојдоа затоа што јас сум познато име, туку веруваат дека треба правда за политички монтирани случаи“,
рече Ајдари.
Случајот во јавноста познат како „Монструм“ се однесува на петкратното убиство кај Смилковското Езеро на 12 април 2012 година. На самото место беа убиени четири момчиња од македонска националност на возраст од 18 до 21 година од населбата Радишани: Филип Славковски, Александар Наќевски, Цветанчо Ацковски и Кире Трпковски и 45-годишниот Борче Стевковски од селото Црешево. Обдукцијата покажа дека во нив е пукано од три типа огнено оружје.
За убиствата беа обвинети шест лица: Агим Исмаиловиќ, Фејзи Азири, Африм Исмаиловиќ, Алил Демири, Хаки Азири и Сами Љута. Африм Исмаиловиќ и Алил Демири веднаш избегаа на Косово и досега не се екстрадирани. По првото судење, петмина од групата добија доживотна казна затвор, но Врховниот суд ја укина пресудата во 2017 година. Случајот го презеде СЈО и судењето почна од почеток, но и по повторената постапка, при која беа земени предвид и т.н. „бомби“, обвинителката Фатиме Фетаи остана на позицијата дека обвинетите го сториле делото, со исклучок на Сами Љума, за кој кажа дека нема докази. Таа побара доживотен затвор за Алил Демири, Африм и Агим Исмаиловиќ за делото тероризам и максимални казни за Фејзи и Хаки Азири, кои се обвинети за помагање во петкратното убиство кај Смилковско Езеро во 2012 година. Максималните казни што ги посочи таа за двајцата обвинети се 15, односно 9 години затвор.