Во периодот на привремената администрација, банката ќе продолжи да работи. Средствата на клиентите остануваат на нивните сметки, но привремено се ограничува нивното повлекување и пренос надвор од банката, со цел да се спречи масовен одлив на ликвидност, појаснуваат од Народната банка
Народната банка информира дека во Алта банка АД Битола е воведена привремена администрација како привремена заштитна мерка со цел банката да продолжи непречено да работи, средствата на клиентите да останат на нивните сметки, а имотот и интересите на сите штедачи и доверители да бидат заштитени до промена на сопственоста на банката.
„Воведувањето привремена администрација е привремена заштитна мерка и не значи затворање на Алта банка АД Битола, ниту активирање на механизмот за исплата на депозитите преку Фондот за осигурување депозити. Алта банка АД Битола продолжува да работи, не е во стечај и не ѝ е одземена дозволата за работа. Банката е ликвидна, високо капитализирана, со солиден квалитет на кредитното портфолио и ги исполнува супервизорските стандарди“,
велат утринава од Народната банка.
Во периодот на привремената администрација, банката ќе продолжи да работи. Средствата на клиентите остануваат на нивните сметки, но привремено се ограничуваат нивното повлекување и пренос надвор од банката, со цел да се спречи масовен одлив на ликвидност.
Па така, физичките лица имаат неделен лимит од 10 000 денари за готовински подигања и плаќања со картичка, а внатрешните трансфери кон други физички и правни лица во рамките на банката остануваат неограничени. Правните лица можат да вршат неограничени внатрешни трансфери во рамките на банката, но не можат да префрлаат средства во други банки, ниту да повлекуваат готовина од банкомати или шалтери.
Кредитокорисниците треба и натаму навремено да ги исполнуваат своите обврски кон банката.
„Приливните плаќања од странство преку СЕПА и кореспондентно банкарство ќе се одвиваат непречено, додека одливните плаќања кон странство нема да бидат достапни привремено за физичките и правните лица. Штедните влогови на физичките лица се осигурени преку Фондот за осигурување депозити до износ од 30 000 евра, согласно законските правила“,
информираат од НБРМ.
Од Народната банка додаваат дека во континуитет ја следат состојбата со банката, а до граѓаните апелираат да не носат одлуки врз основа на непроверени информации, посочувајќи дека непотребното и масовно повлекување средства не е во интерес на штедачите.