Обвинителството го бараше притворот бидејќи постои опасност осомничениот да избега, да влијае врз оштетениот и сведоците, како и да го доврши обидот за убиството
Набргу откако Основното јавно обвинителство (ОЈО) Струга соопшти дека отворило истрага за обид за убиство и бара притвор за напаѓачот на началникот на струшката полиција, од Министерството за внатрешни работи соопштија дека на осомничениот му е одреден 30-дневен притвор и тој е спроведен во затворот „Скопје“ во општината Шуто Оризари.
„Од страна на судија на претходна постапка одредена му е мерка притвор во траење од 30 дена, по што С.Н. е спроведен во КПУ Скопје“,
соопштија од МВР.
Претходно обвинителството соопшти дека го бара притворот бидејќи постои опасност осомничениот да избега, да влијае врз оштетениот и сведоците, како и да го доврши обидот за убиството.
Осомничениот е 44-годишен жител на струшкото село Велешта. Инцидентот се случил вчера кога тој со автомобил го престигнал и блокиран началникот на полицијата во Струга. Прво започнал да му вика и да му се заканува дека ќе го убие со пиштол обвинувајќи го дека постојано испраќал полицајци да го следат.
„Оштетениот излегол од возилото и меѓу нив настанала кратка физичка пресметка, по што ги раздвоиле случајни минувачи. Оштетениот влегол во автомобилот за да повика полиција, но во тој момент осомничениот го препаркирал возилото зад него, излегол со нож во раката и му нанел расекотина под долната вилица кон вратот, со должина од 11 и со длабочина од 5 сантиметри“,
соопштија претходно од обвинителството.
Осомничениот по нападот избегал, но потоа беше приведен од страна на полицијата.