„Пардата на гордоста“ мина мирно и без инциденти низ скопските улици и во Градскиот парк, но попладнево се случил инцидент во општината Сарај.
Министерството за внатрешни работи извести дека активистот Беким Асани од Тетово, кој бил заедно со тројца државјани на Албанија и двајца на Босна и Херцеговина, околу 16 часот биле пресретнати од 7-8 лица кај кањонот Матка. Откако биле вербално нападнати затоа што се припадници на ЛГБТИ заедницата, Асани и останатите влегле во такси возило за да избегнат проблеми и се упатиле кон Сарај. По нив тргнало Ауди со скопски регистарски таблички, кое ги престигнало кај плоштадот „Иса Булетини“ во Сарај и го пресекло патот на такси возилото, принудувајќи го да запре. Возачот на Аудито излегол од возилото и прво вербално а потоа и физички го нападнил Беким Асани. Во меѓувреме пристигнала полицијата која го привела напаѓачот, 30 годишниот Јетмир А. од Скопје.