Без инциденти и провикации денеска во Скопје се одржа првата македонска „Парада на гордоста“. Со знамиња во боите на виножитото, демонстрирајќи ја гордоста на ЛГБТИ-заедницата, учесниците тргнаа од паркот „Жена борец“ точно напладне. Се забавуваа по скопските улици и ги испратија своите пораки против дискриминација, насилство и говор на омраза. Завршија кај „школка“ во Градскиот парк каде продолжи забавата и се слушнаа главните пораки.
„Никој не е слободен додека сите не се ослободат“, порача Кочо Андоновски од Центарот за ЛГБТИ права, кој беше претставен како „прв во Македонија што излезе од фрижидерот“. Тој потсети на нерасветлените случаи на насилство и напади врз Центарот додека беше сместен во Старата чаршија. Сепак, им се заблагодари на претствниците на власта за присуството и за поддршката што ја добиваат во нивната борба.
Министерката за труд и социјална политика, Мила Царовска, рече дека Владата и декларативно, но и во пракса работи на подобрување на состојбите.
„Знаете зошто?! Затоа што веруваме во општество што е еднакво, општетво што дава шанса секому“, порача Царовска во обраќањето пред учесниците на парадата.
Од организацискиот одбор иронично порачаа дека е добро што за првата „Парада на гордоста“ не морало да се чека сто години туку дека се одржува на 50-годишнината од бунтот во Стоунвол, настани што се сметаат за пресвртница во ЛГБТИ-движењето.
Нашата музичка ѕвезда Тамара Тодевска, во духот на името на настанот – “Pride Parade”, ја испеа „Proud“ – песната која на годинешната Евровизија освои најмногу бодови од стучните жирија на земјите-учеснички.
На парадата „360 Степени“ забележа повеќе личности од политичкиот живот. Меѓу нив беа вицепремиерката Радмила Шеќеринска, министерката за труд и социјална политика Мила Царовска, министерката без ресор Зорица Апостоловска, повеќемина пратеници од владејачкото мнозинство, в.д. амбасадорката на САД во С. Македонија, Микаела Швајцер-Блум, амбасадорот на Франција, Кристијан Тимоние, амбасадорот на Холандија, Ваутер Пломб, заменик-амбасадорот на Шведска, Јохан Хенриксон…
По целата рута по која се движеше поворката и особено во градскиот парк беше видливо големо присуство на полиција – помалку во униформа, повеќе во цивилна облека.
Гордоста и традиционализмот на паралелни маршеви во Скопје
Речиси истовремено со „Парадата на госрдоста“, само неколку стотини метри подалеку, од пред црвката „Св. Богородица“, почна и маршот „Сведоштво за семејството“. Поворката ја предводеше музичар на традиционален тапан, а зад него, во првите редови, трансапрентите ги носеа деца. Меѓу учесниците на маршот, освен обични граѓани, можеа да се забележат и значителен број свештени лица, калуѓерки, членови во црковни хорови.
Испратија порака дека „најголем процент од верниците не го прифаќаат процесот што треба да доведе до редефинирање на тоа што е брак, семејство, пол и род.“
